Friday, October 17, 2014

இந்த நாள் இது இனிய நாள்...

18 அக்டோபர் 2012.
                           தனிக்cotஉ ராஜாவா சுத்திட்டு இருந்தவன், சாந்தலட்சுமிங்கிற அப்பாவிக்குத் தாலி கட்டி, தனக்குத்தானே வேலிபோட்டுக்கிட்ட நாள்.போன வருசமே எழுதிருக்கவேண்டிய விசயம், அப்போதான் வெண்ணிலா பொறந்து,பொரண்டுட்டு இருந்ததால ,டயப்பர் மாத்தவே டைம் பத்தல.அதனால ரெண்டுவருசத்துக்கும் சேர்த்து இப்ப எழுதவேண்டியதாப் போச்சு.
                        பாத்துப் பாத்து லவ் பண்ணிக் கட்டியிருந்தாலும்('அப்டியே பண்ணிட்டாலும்' நு அடைப்புக்குறிக்குள் போட்டு காமெடி பண்ணுவது கிளிஷே ஆகிவிடுமென்பதால் போடவில்லை) , இவ்ளோ பொருத்தமான பொண்ணு கிடைச்சிருக்காது.
                      அவங்க வாரியார் பேத்தி, நான் பெரியார் பேரன். அங்க கந்தசஷ்டி கவசம், சைவம்,தகிக்கும் சென்னை; இங்க ராஜா பாட்டு,அசைவம், பெங்குளுரு. ஏட்டிக்கிப் போட்டிதான் அதிகம்.
அம்மிணியை நான் மொதல்ல ஃபோட்டோல பாத்ததே ஆர்குட்லதான். இங்க ஆர்க்குட்டு,ப்ளாக்குநு பலப்பல ரவுண்ட் அடிச்சிட்டு டிவிட்டர்ல இருக்கேன்.எல்லாமே ஏறுக்குமாறா இருந்ததால, வேறவழியே இல்லாம, அன்பை மட்டும் பொதுவாப் பரிமாறிக்கவேண்டியிருந்தது.பின்ன....அதானங்க வாழ்க்கை...
                      ஆக்சுவலி, ஒரு டீச்சர் பொண்ணத்தான் நான் கல்யாணம் பண்ணனும்னு நினைச்சிருந்தேன்.ஸ்கூல் படிக்கிறப்போ பசங்களுக்கு ஃபர்ஸ்ட் கிரஷ் டீச்சர்தானே....அப்புறம் அழியாதகோலங்கள் ஷோபா...இப்டிப் பல கற்பனைகள். ஆனா அமைஞ்சது சாஃப்ட்வேர் அம்மிணி.அவங்களுக்கு தெரிஞ்ச ஜாவா வேற. எனக்குத் தெரிஞ்ச ஜாவா வேற(நான் ஆட்டோமொபைல்). ஆனா கல்யாணத்துக்கப்புறம் மனைவி டீச்சர்தான்னு புரிஞ்சிக்கிட்டேன்.
அவங்க வீட்டைப்பத்தி ஹிஸ்டரி பாடம் எடுக்கும்போதெல்லாம் , கடைசிபெஞ்ச் ஸ்டுடண்ட் மாதிரிக் கவனிப்பேன்.
                  ரெண்டுவருசம் போனதே தெரியல.இப்ப வெண்ணிலாவுக்கு ஒருவயசாயிடுச்சு...வெண்ணிலா, அம்மா வயிற்றில் இருந்த காலங்கள்,என்றைக்கும் மறக்க இயலாது. அவ்ளோ ஜாக்கிரதையாப் பாத்துக்கிட்டா.உணவுக்கட்டுப்பாடு, தூக்கமில்லாமை, கை கால் உளைச்சல் நு ரெண்டு வரில நான் எழுதிட்டுப் போயிடுவேன். அதன் உண்மையான அர்த்தம் அவளுக்குத்தான் தெரியும்.க்ரேட்....!!!!
                 ஏழு அல்லது எட்டாவது மாசங்கள்ல அரைமணிநேரத்துக்கு மேல வயித்துல கொஞ்சம் அசைவு இல்லேன்னாலும், வெளியே சொல்லமுடியாத கலவரம் உண்டாயிடும் அவளுக்கு. அந்த டைம்ல ஃபோன் பண்ணினா, அமைதியா இருப்பா.கொஞ்சங்கொஞ்சமா பேச்சுக்கொடுத்து, பாப்பா ஆடலைனு தெரிஞ்சுப்பேன்.எனக்கும் பயம் இருக்கும்.இருந்தாலும் 'ஒன்னும் இல்லம்மா.தூங்கிட்ருப்பாடா'நு சமாளிப்பேன். அந்த சமயங்கள்ல பக்கத்துல இருக்க கோயிலுக்குப் போயிடுவா. கோயில்மணிச் சத்தத்துல 'களுக்'நு துள்ளுவா வெண்ணிலா.அப்பத்தான் நிம்மதியே வரும் அவளுக்கு. 'சித்திரையில் நிலாச்சோறு' படத்துல 'கல்லால செஞ்சுவச்ச' பாட்டு போட்டா, வயித்துக்குள்ளயே ஆடுவா வெண்ணிலா.....

                   பாத்துப்பாத்து பத்திரமா வளர்த்தெடுத்துட்டு இருக்கோம் வெண்ணிலாவை.எங்களை எப்பவும் பிஸியா வச்சிருக்கா வெண்ணிலா...இந்த ஸ்கெட்ச் பண்ணி கிஃப்ட் கொடுக்கக் கூட வீட்ல டைம் கிடைக்கல(சர்ப்ரைஸ்க்காக)...நேத்துதான் வெளிய ஒரு காஃபி டே யில் வரைந்து ரெடிமேட் ஃபிரேமில் போட்டுக் கொடுத்தேன். எனக்கு ரெடிமேட் ட்ரெஸ் கிடைச்சது ......


   

Sunday, April 1, 2012

சாப்பாடு சிறப்பு சும்மாட்ராக்கள் + வான்காஃப்+சைக்கிள் -நீர்வண்ண ஓவியங்கள்

  ஊருக்குப் போய் வந்தது அலைஞ்சதுன்னு, கொஞ்சநாளாவே ப்ளாக் அப்டேட் இல்லை.விசைப்பலகைக்கு ஓய்வு கொடுத்தாலும் தூரிகைக்குக் கொடுக்கவில்லை.அவ்வப்போது வரைந்தவற்றில் சில இங்கு,,,


கேரளமீன் வறுவல்(சாப்பிட்டதில்லை.ஆனால் வரைந்ததில் ஃபேவரைட்:)  )

 அப்பளம்
 பழக்கூட்டு, ஐஸ்கிரீம் மற்றும் ஜெல்லி
 தோசை
சமோசா
தண்ணீர்(லைவ் செட்டப்)



இதர சில சும்மாட்ராக்கள்
சைக்கிள்(A4 size)


 தீப்பெட்டி



 பென் ட்ரைவ் (என்னோட sandisc)  :))


Tuesday, March 27, 2012

திருமண அழைப்பிதழ்-எனது வடிவமைப்பு

   நண்பர் கார்த்திகைப் பாண்டியன் திருமணம் நிச்சயித்த உடனேயே சொல்லிவிட்டார், ‘தலைவரே,நம்ம இன்விடேஷன் நீங்கதான் டிசைன் பண்ணனும்னு’...அந்தா இந்தான்னு தள்ளிப்போட்டுட்டேன். சரியாத் தோணலை. கூகிள் இமேஜஸ் பார்க்கையில், மோட்டார்சைக்கிளில் ஒரு சோடி செல்வது போன்ற படம் பார்த்தேன். அடடே...இது நல்லா இருக்கே...

   எத்தனை நாள்தான் திருமணப்பத்திரிக்கையில் ஆணும், பெண்ணும் கழுத்து வலிக்க மாலையோடும், கைநிறையப் பூச்செண்டோடும் காட்சியளிப்பது?? கொஞ்சம் வித்தியாசமாக இருக்கட்டுமென , நான் பார்த்த புகைப்படத்தை லைன் ட்ராயிங்காக மாற்றினேன் ஆர்டிஸ்ட் பென் உதவியுடன். மாப்பிள்ளைக்கு அனுப்பி அபிப்ராயம் கேட்டதில் , பெண்ணுக்குப் பிடித்துவிட்டதெனச் சொன்னார்.அப்ப இவருக்கும் பிடிச்சமாதிரித்தான் என எண்ணிக் கொண்டேன்.

    கொஞ்சம் வண்ணங்களைப் பூசி, நம்பர் ப்ளேட்டில் அவர்களின் திருமணத் தேதியை எழுதிவிட்டதில் திருமண அழைப்பிதழ் தயார்....:)))

  பி.கு: கூகிளில் புகைப்படம் பதிவேற்றிய ஃபோட்டோகிராஃபர் நண்பருக்கு (Paul) க்கு நன்றிகள்....










Thursday, March 8, 2012

லால்பாக் பென்சில்ஜாம் @ 04மார்ச்12 மற்றும் சில சும்மாட்ராக்கள்

  நான்காம்தேதிய பென்சில்ஜாம் நடந்த இடம் , வேறெங்க, கழுதெ கெட்டாக் குட்டிச் சொவருதான்....:) லால்பாக்தான்...

   ஒவ்வொரு வருகையிலும் ஒவ்வொரு அழகை ஒளித்துக்காட்டுவதில் லால்பாக்கும் ஒரு காதலிதான் எனக்கு ;)
எங்கள் கூடல் இம்முறை ஜப்பானிய மூங்கில் பாலம் அருகில். புதிதாக இரண்டு ’பெண்’’ஜில்’ ஜாம்மர்கள் வந்திருந்தனர். பேக்கு போல முழித்துக் கொண்டிருந்த அழகிகளை வரவேற்றேன்...நாந்தான் பென்சில் ஜாம்மர்ஸ் அட்மின் நு ஒரு பில்டப் கொடுத்தேன்.  பரவாயில்லை, நல்லாவே மரியாதை கிடைக்குது. நுழைவுக் கட்டணம்  500 ரூபாய்ன்னு சொன்னதும் மிரண்டன மான்களின் விழிகள். அதற்கு மேல் விளையாட்டை இழுக்காமல், உண்மையைச் சொல்லிவிட்டேன்....

   காலையில் வரைந்தது இரு வாட்டர்கலர் லேண்ட்ஸ்கேப்புகளும்....


மதியம் லஞ்ச், அருகிலுள்ள ஹரி சூப்பர் சாண்ட்விச்சில்....அடடா அடடா... எத்தனைவகை சாண்ட்விச், தயிர் சாண்ட்விச், சீஸ் சில்லி சாண்ட்விச், குல்கந்து சாண்ட்விச், சாக்லேட் சாண்ட்விச் இன்னும் பல...

    ச்சாட் வகையறாவாக, ‘காங்கிரஸ் மசாலா’ இருந்தது, என்னடான்னு கேட்டா, ஒரு காலத்துல காங்கிரஸ் இரண்டாப் பிரிஞ்சதனால, இரட்டையாகப் பிளவுற்ற கடலையைப் போட்டு மசாலா தடவி விற்பது காங்கிரஸ் மசாலாவாம். அடப்பாவிங்களா...அப்டிப்பார்த்தா, எங்கூர்ல டாஸ்மாக்ல தர்ற பொடிமாஸ்ஸைத்தான் காங்கிரஸ் மசாலான்னு சொல்லணும்னு மனசுக்குள்ள நினைச்சுக்கிட்டேன்:))


  அப்டியே சுத்திட்டு, மாலை வரைந்தது இந்தத்தூண்...வேடிக்கை பார்த்த பையனொருவன் அருகில் வந்தான். அவனையும் வரைந்து கொடுத்தோம்.
இனிதே நிறைவுற்றது அன்றைய நாள்...

இனி சிறிது சும்மாட்ராக்கள், இடைப்பட்ட காலத்தில் செய்தவை...
 பெண்கள் தின சிறப்பு ஓவியம்
 

 AXE effect
 சாவி


Sunday, February 26, 2012

பென்சில் ஜாம் @ பார்க்கிங் ஏரியா மற்றும் சில சும்மா ட்ராக்கள் 26ஃபெப்12

  அவ்வ்வ்...இன்னிக்கு பென்சில்ஜாம் நடக்க இருந்த இடம் பெங்களூர் turf club. அதற்கான முன் அனுமதியெல்லாம் வாங்கிவிட்டதாகச் சொன்னார்கள்.ஆனால் அங்கு சென்றால் சம்பந்தப்பட்டவரிடம் இருந்து அனுமதி வரவில்லையாம். வரைஞ்சா அங்கதான் வரையணுமா என்ன, வெளிய ரேஸூக்காக வருபவர்களின் பார்க்கிங் ஏரியாவில் பட்டறையப் போட்டாச்சு.

   அங்க ரொம்பநாளாக் கவனிப்பாரற்றுக் கிடந்த இந்த டாட்டா சுமோவும், சில ஸ்கூட்டர்களும்தான் என் கண்களை ஈர்த்தன.

ரெய்னால்ட்ஸ் பென்னில் A5 size ஸ்கெட்ச் புத்தகத்தில் வரைந்தது.


கீழே உள்ளவை இடைப்பட்ட நாட்களில் கிறுக்கிய சும்மா ட்ராக்கள்...
காந்தி
 இது சும்மா ட்ரா ப்ளாக்ஸ்பாட்டின் 100 வது தலைப்பு 100 க்காக வரைந்தது

 திராட்சைகள்
 வால்ரஸ்
 காரட்

Tuesday, February 14, 2012

காதலர்தினக் கொண்டாட்ட ஓவியம் 14ஃபிப்12

காதலர்தின வாழ்த்துக்கள்
எனது ட்வீட்ஸ் + ஓவியம்

தவிர்ப்பவர்களால் கூட வெறுக்க முடியாத ஒரு விஷயம் காதல்தான்

காதலை மூட்டைகட்டி விட்டு வாழ்க்கையைப் பார்க்கச் சொன்னாள்.அதனால்தான் முதுகில் சுமந்துகொண்டு திரிகிறேன்.

காதலைச் சொல்வதில் உனக்கும் எனக்குமான உத்திகள் நேரெதிரானவையாக இருந்தாலும்,பிரிதலில் மட்டும் ஒரே வழிதான்,’உன்மேல தப்பு’

காதலில் மட்டும்தான் நிறைகுடமும் தளும்பும்


காதலிலும், குழந்தைமையிலும் மட்டுமே திருட்டுத்தனங்களும் ரசிக்கும்படி இருக்கும்

கண்ணி வெடிகள் புதைந்திருக்கும் உன் மௌனத்தில் ஒரு சொல் வைக்கவும் அச்சம்

கடலையும் காட்டி, படகையும் கொடுப்பது வாழ்க்கை.துடுப்பினைப் பிடுங்கி,கண்களையும் கட்டுவது காதல்#கிக் வேணும்ல

காதலைச் சொல்வதற்கு மிக நளினமான வழி,’அதை நாசூக்காக மறைப்பதுதான்’