வானம் வசப்படும்

சித்திரசந்தை பெங்களூர்

2012-01-27T18:52:00.003+05:30

ஆண்டுக்கொருமுறை பெங்களூர் சித்ரகலா பரீஷத் வளாகம் மற்றும் அதனைச் சுற்றியுள்ள இடங்களில் ,சித்ரசந்தை என்னும் ஓவியக் கண்காட்சி சித்ரகலாவால் நடத்தப்பட்டு வருகிறது. மேலும் விபரங்களுக்கு இங்கு செல்க...
http://chitrasanthe.com/

சென்றமுறை நடந்த போது, நான் பெங்களூரில் இருந்தாலும் தவறவிட்டுவிட்டேன். இம்முறை எனது 10 ஓவியங்களையும் காட்சிக்கு வைக்கிறேன்.விருப்பமும், நேரமும் இருப்பவர்கள் தவறவிடாதீர்கள்...

கெம்பேகவுட அருங்காட்சியகம் பெங்களூர் 25122011

2011-12-26T01:14:00.004+05:30

வாட்டர்கலர் ஆன் வாட்டர்கலர் பேப்பர்...
ஏற்கெனவே இதே இடத்தின் முன்பகுதியை பால்பாயிண்ட் பென்னால் வரைந்தது குறிப்பிடத்தக்கது ;)

நந்தி ஹில்ஸ்-பெங்களூரு-241211-படங்கள்

2011-12-24T23:01:00.005+05:30

பெங்களூரைத் தாண்டி வெளியிடத்திற்குச் சுற்றலாம் எனக் காற்றில் ஒரு திட்டம் போட்டு வைத்திருந்தேன். உறுதுணையாக தம்பி ரசிகன் மகேஷ் சென்னையிலிருந்து வருவதாகவும் சொல்லியிருந்தார். அவர் வேலை புகைப்படம், என் வேலை ஸ்கெட்சிங்...

எட்டு மணிக்குத் திட்டமிட்ட பயணம் தொடங்க பத்துமணி ஆகிவிட்டது.60 கிமீட்டர்கள். வண்டியிலேயே பயணம். அது ஹில்ஸ்டேஷன் எனக் கேள்விப் பட்டிருந்ததால், ஜெர்கினோடு வேறு பயணம். போகும் வழியில் வியர்த்தபோது, ‘சரி இங்கதான் இப்டி, மலையேறியாச்சுன்னா ரொம்ப உபயோகப்படும்’ என சுய சமாதானம் சொல்லியவாறே தொடர்ந்தோம். ஒயிட்ஃபீல்டிலிருந்து, ஹொஸ்கட்டே, தேவனஹல்லி வழியாக நந்திஹில்ஸ் போவதுதான் எங்கள் வழித்திட்டம். ஸ்டேட் ஹைவேஸ், போக்குவரத்து நெருக்கடி, சிக்னல் எதுவும் இல்லாததால் இனிதாகப் பயணித்தோம்.

8 கிமீட்டருக்கு முன்னதாக மலைப்பாதை ஆரம்பம். எனக்கு சும்மாவே ஹைட்டுன்னா பயம். எப்படி வண்டி ஓட்டப் போகிறேனோ என மனசுக்குள் மாரியாத்தாளைக் கும்பிட்டபடி , தக்கிமுக்கி மலையுச்சி சென்று சேர்ந்தோம்.(4000 மீட்டர் கடற் பரப்புக்கு மேலே). போனா சுள்ளுன்னு அடிக்குதுய்யா வெயிலு...அவ்வ்வ்வ்

அப்படியொன்றும் ஈர்ப்பான இடமாய்ப் படவில்லை எனக்கு. வெயில் வேற கொல்லுது, நான் கற்பனை செய்த காட்சிகள் எதுவும் இல்லை. என்ன சுற்றிப்பார்ப்பது எனத் தெரியாமல் வாழ்க்கையே வெறுத்துப் போனோம். அப்போது எங்களைக் கடந்த ஒருவரிடம், இந்தப் பக்கம் போகிறீர்களே என்ன இருக்கிறது எனக் கேட்டோம்.அவர் சொன்னபதில் சூழலுக்குத் தக்கது, ‘சூஸைட் பாயிண்ட்’.இதுக்கு இவ்வளவு தூரம் மேல வரணுமா?? வீட்டிலேயே ‘மங்காத்தா’ சீடி, இல்ல சாருவோட ப்ளாக் படிச்சாப் போதாதான்னு தோணுச்சு...

பக்கத்துலயே திப்பு லாட்ஜ் இருந்தது. அவர் சம்மர் ல இங்கு வந்து தங்குவாராம்.யோவ் விண்டர்லயே இங்க வேகுது, சம்மர்ல என்ன கிளுகிளுப்புய்யா இருக்கும் உமக்குனு மனசுக்குள்ள திட்டிட்டு உடனே மன்னிப்பும் கேட்டுக்கிட்டேன். அந்த இடத்துல பெரிய அளவுல ,வாழையிலை போன்ற இலைகள் பார்த்தேன். பெயர் தெரியவில்லை.(படம் கீழே)...

இன்னும் மேலே போனா, நந்தி கோயில் இருக்கு. கால்ல மாவை இழுகிட்டுப் போனா, ஒரு நிமிசத்துல தோசையாப் பிச்சு வாயில போட்டுக்கலாம் போல மொட்டப் பாறைல கொட்டிக் கிடக்குது வெயிலு....சரி கடமையைச் செய்வோம்னு வேலையில இறங்கிட்டேன்...

வாட்டர்கலரில் இருக்கும் பூக்கள் வழியில் பார்த்தவை. பெயர் தெரியவில்லை என ‘நிம்மி’, ‘ஜிம்மி’ எனப் பெயரிட்டு ஃபேஸ்புக்கில் பகிர்ந்திருந்தேன். நண்பர் ஒருவர் அது ‘ஸ்லீப்பிங் ஹைபிஸ்கஸ்’ எனச் சொன்னார். சரி நம்ம சாதிதான் போலன்னு நினைச்சுக்கிட்டேன்...

வாழையிலையை வாட்டர்கலரில் வரைய நினைத்து மொக்கையாகிவிட்டது. ‘pen' புத்தி பின் புத்தி என்பதுபோல பின், பென்னால் சரிசெய்ய முயற்சித்தேன்.

இந்த சிலைகள், நந்தி கோயிலுக்குள் இருக்கும் துணை தெய்வங்கள்...(நல்ல வேளை ஜெயமோகன் கண்ணுல படல. பட்டா, ‘சூடு’ன்னு 5000 பக்கம் நாவல் எழுதிருப்பாரு.)பால்பென்னில் வரைந்தது....

சிலையும் கலையும் -பெங்களூர்-18டிசம்பர்2011

2011-12-18T18:11:00.004+05:30

நேற்றிரவு சமகாலட்விட்டர்களான டிபிசிடி(டிபிகேடி),பாலா, சமூகம் (எ) சண்முகம் ஆகியோரும், சங்ககால ட்விட்டர்களான புருனோ மற்றும் அடியேனாகிய நானும் ஒயிட்ஃபீல்டிலுள்ள எனது வீட்டில் கூடி சமூகப் பிரச்சினைகளை ஆய்ந்தணுகினோம். பின்நவீனத்துவத்தில் ஆரம்பித்துப் பல விஷயங்களைப் பிய்த்துப் பிராண்டினோம்.நல்லதொரு சந்திப்பு. கார்த்திக் அருள் மற்றும் முகம்மது கஃபில் இல்லாதது மட்டுமே குறை.

இரவு தொடர்ந்து, காலை வரை ஒவ்வொருவராகப் பறவையின் கூட்டிலிருந்து விடைபெற்றுச் சென்றனர்.

காலையில் கப்பன் பார்க்கிற்கு அருகிலுள்ள அரசு அருங்காட்சியகத்திற்குச் சென்றிருந்தேன். இன்று பென்சில் ஜாம் அங்கேதான். பெங்களூர் வந்து ஒன்றரை ஆண்டுகள் ஆனாலும் இன்னும் கப்பன் பார்க் சென்றதில்லை. இன்று அதன் அருகில் சென்றும் உள்ளேசெல்லவில்லை. அருங்காட்சியகத்தில் என்ன இருக்கும்?
பழைய போர்க்கருவிகள், உடைந்த பானைகள், சிலைகள்(தலையுடனும், தலையில்லாமலும்) இன்னும் பண்டைய பொருட்கள்...

போய் வந்ததின் நினைவாகச் சில ஓவியங்கள்...
முதலாவது...
வித்தியாசமாகத் தென்பட்ட பண்டையப் போர்க்கருவிகள்.. பிட் பென், வாட்டர்கலர் இன் வாட்டர்கலர் பேப்பர்...

இரண்டாவது ஒரு சிலை....பிட் பென் இன் வாட்டர்கலர் பேப்பர்...

மூன்றாவது வெளியே கேண்டீனில் டீ சாப்பிட அமர்ந்தபோது திடிரென வரைய ஆரம்பித்தது. கொஞ்சம் சப்பையாத்தான் இருக்கும்.அதிகத் திட்டமிடல் இல்லாத காரணத்தால்...வாட்டர்கலர் இன் வாட்டர்கலர் பேப்பர்...

சிலைகளை வரைவது மிகக் கடினமாக இருந்தது. அடுத்தவாரம் நந்திமலை சென்றுவரலாமென ஒரு எண்ணம்.

சொந்தக் கதை சோகக் கதை 111211

2011-12-11T22:34:00.005+05:30

ஷ்ஷப்பா....

இந்த வீக் எண்டு பெண்டை நிமிர்த்திருச்சு. ஜெர்மன் ட்ரிப் முடிஞ்சு போன வாரம் ஊருக்குப் போயிட்டு வந்ததால ஏகப்பட்ட வேலை பெண்டிங்.நேத்தும் இன்னைக்கும் ஒரு வழியா ஓரளவுக்கு முடிச்சு வச்சேன்.

*வண்டி இன்சுரன்ஸ் ரெனுவல்(சொல்ல மறந்துட்டேன் வண்டி எடுத்து ஒரு வருஷம் ஆச்சு. நேத்து அதுக்கு ரெண்டாவது பிறந்தநாள். சர்வீஸ் முடிஞ்சதும் நேரா பெட்ரோல் பேக்கரி போய் 5 லிட்டர் பெட்ரோல் ஊட்டிவிட்டேன்)
*வண்டி சர்வீஸ்
*துணியெல்லாம் துவைக்கக் கொடுத்தாச்சு
*சாக்ஸ் தொவைச்சாச்சு(30 செட்டு)(ஒரு மாசத்துக்குக் கவலையில்லை)
காயப் போட்டாச்சு.(காயவைக்கிற இடம் ?? இருக்கவே இருக்கு டிராயிங் போர்டுதான்)
*இன்னைக்கு பென்சில் ஜாம் செஸ்ஸன் அட்டெண்ட் பண்ணியாச்சு(ரொம்ப நாளைக்கப்புறம் பிரஷைத் தொட்டேன்)
*ரூம் கிளீனிங்(80% ஓவர்)
*நைட் சிக்கன் சமையல்

வீக் எண்ட்ல மதியம் தூங்குறதைக் கஷ்டப்பட்டு தியாகம் பண்ணிட்டா ஏகப்பட்ட வேலை செய்யலாம்...
நாளைக்கு ஆஃபீஸ் போறதுக்குக் கூட எல்லாம் ரெடி. ஷர்ட் அயர்ன் பண்ணியதை வாங்கி ஹேங்கரில் தொங்கவிட்டாச்சு. பேண்ட்ல பெல்ட் உட்பட எல்லாம் போட்டு செட் பண்ணியாச்சு. சாக்ஸை ஷூ மேல வச்சாச்சு. ஆனா ஒரே ஒரு முக்கிய வேலை அதுதான் பிரச்சினையும் கூட. நாளைக்கு அட்லீஸ்ட் ௮ மணிக்காவது எந்திருக்கணும்...

ரூம் க்ளின் பண்ணதுல முக்கியமான விஷயம், இனிமேதான் கமிட்மெண்ட்ஸூக்கெல்லாம் படம் வரைஞ்சு கொடுக்கணும்,,, பஸ்ல வராட்டி இன்னும் கொஞ்ச நேரம் மிச்சமாகும்...

இந்தக் கதையெல்லாம் சொல்ல ஒரு போஸ்ட்டான்னு கேக்கக் கூடாது. சரி விஷயத்துக்கு வர்றேன். இன்னைக்கு பென்சில் ஜாம், அல்சூர் ஏரி தான். கடந்த ஆறுமாசத்துல இது மூணாவது தடவை. ஏற்கெனவே ஒருதடவை பண்ணி எனக்குப் பிடிக்காத ஒரு வியூவை இன்னைக்கு மறுபடியும் பண்ணேன். பெட்டர். ஆனால் இன்னும் பிடிக்கலை. :(

இருந்தாலும் உங்கள் பார்வைக்கு...அல்சூர் ஏரி...

நம்ம பதிவுகள்ல மக்களுக்குத் தேவையான விஷயம் இல்லைன்னு பலபேர் சொல்லக் கேள்வி...அதான் ஒரு கருத்து சொல்லிட்டுப் போகலாம்னு....மன்னிச்சூ....

“பொய்யை ஒத்துக்கிட்டவனின் கஷ்டம், அடுத்து அவன் உண்மையே பேசும்போதுதான் தெரியவரும்”

ஜெர்’மென்’ அண்ட் ’விமன்’

2011-12-06T20:45:00.017+05:30

காலை, மாலை இரு வேளைகளிலும் மெட்ரோ ரெயிலில் அரைமணிநேரப் பயணம் அலுவலகத்திற்கு. அப்போது கிறுக்கியது. படங்களைப் பார்த்தாலே ஜெர்மானியர்களின் கேரக்டர்கள் புரிந்திருக்கும். வெட்டிப் பேச்சு கிடையாது. ரயிலுக்குக் காத்திருப்பதிலிருந்து, ஏறி, அமர்ந்து, நின்று, இறங்கும்வரை கையி ல் ஏதாவது ஒரு புத்தகம்(ஜெர்மன் மொழியில்தான்) அல்லது ஸ்மார்ட் ஃபோனில் பிரவுசிங் அல்லது கேமிங்...

அவர்களின் செயல்களை சிம்பிளாக வரைய நினைத்துப் பின் அவர்களின் முக வேறுபாடுகளில் கவனம் செலுத்திவிட்டேன். சிறு சிறு கோடுகளாக இணைக்காமல், பெரிய பெரிய ஸ்ட்ரோக்குகள் வரையச் செய்த முயற்சிகள் இவை.பார்த்தமைக்கும், ரசித்தமைக்கும் நன்றிகள்...!

நாளிதழ்களில் வருவது போல் ஒரு ஃப்ளாஷ் நியூஸ்,,,, இதே படங்களை ஃபேஸ்புக்கில் ஷேர் செய்திருந்தேன். இண்டர்நேசனல் ஃபேமஸ் வாட்டர்கலரிஸ்ட் டெரைன் அவர்களின் லைக்கும், கமெண்ட்டும் கீழே...
சில விஷயங்கள் சிலருக்கு சாதாரணமாகவும், சிலருக்கு வெகு அசாதாரணமாகவும் தோன்றலாம். எனக்கு இது இரண்டாவது வகை. ஒரு சின்ன லைக் எவ்வளவோ செய்யச் சொல்லும். நன்றிகள் அனைவருக்கும்...!

ஒற்றையிலை

2011-11-04T03:20:00.002+05:30

இங்கு இப்போது இலையுதிர்காலம். வெளியில் எங்கு சென்றாலும் கண்ணைக்கவர்வது மஞ்சள், சிவப்பு நிறங்களில் மேப்பில் இலைகள்தான்.
மரம் வரைவது லட்சியம், இப்போதைக்கு இலை நிச்சயம் என நேற்று எடுத்துவைத்திருந்த ஒற்றையிலையை எடுத்தேன்.புத்தகத்தினுள் வைத்திருந்ததால் நிறம் மங்கி வாடிப்போயிருந்த இலைக்கு, காகிதத்தில் கற்பனை வண்ணம் கொடுத்து வைத்தேன்.
வாட்டர்கலர், சைஸ், துரித பெயிண்டிங்....

பார்த்து ரசித்தமைக்கு நன்றிகள்....!

நம்மூர்ல இந்த மரம் பார்த்ததா ஞாபகமில்லை. அங்க என்ன பேர் இதுக்கு?

சுற்றம் 'பார்க்'கின் குற்றம் இல்லை‍ லைவ் ஸ்கெட்ச் 301011

2011-10-30T22:32:00.007+05:30

கொஞ்ச நாளாக் குளிர் விட்டுப் போச்சு. எனக்கு மட்டுமில்லைங்க. இங்க குளிர் குறைஞ்சிடுச்சு...இரண்டு வாரமாச்சு. ஓரளவு பழகியாச்சு.

எல்லா இடத்துலயும் ஜெர்மன் மொழியில்தான் எழுதி இருக்காங்க. ஏதோ நினைப்பில நாம நடந்து போன, எதிர்ல வர்றவங்க 'ஹலோ' சொல்லிட்டுப் போறாங்க. திடுக்கிட்டு என்னனு பார்க்கிறதுக்குள்ள அவங்க வேலையைப் பார்த்துட்டுப் போக ஆரம்பிச்சுடுறாங்க.

நிறையப் பேர் சைக்கிள் வைத்திருக்கிறார்கள். சைக்கிளை டிரையினிலும் ஏற்றுகிறார்கள்.நல்ல யோசனைதான்.

குளிரைத் தாங்குவதற்காக எல்லாக்கட்டிடங்களுமே பாதிக் கட்டுமானம் மரத்தில் செய்திருக்கிறார்கள். மச்சுவீடு மாடிவீடு எல்லாம் கிடையாது, பார்த்தவரை ஓட்டு வீடுதான்.#நல்ல தரமான கட்டைகள் போலும்

பெண்கள்... எழுத ஆரம்பித்தால் மானிட்டர் நனைந்துவிடும். அலுவலக லேப்டாப் என்பதால் அதனைத் தவிர்க்க நினைக்கிறேன். ஒரே வரியில் சொன்னால், 'திருத்தமாக இருக்கிறார்கள்'. ரயிலிலேயே மேக்கப்பையும் முடிக்கிறார்கள்(எல்லா ஊர்லயும் இதே கூத்துதான் போல).போன பாராகிராப்பில் கடைசியில் போட்ட ஹேஷ்டேக் வார்த்தைகளை இந்த பாராகிராப்போடு நீங்கள் குழப்பிப் படித்தான் நான் பொறுப்பல்ல ;)

இன்னும் ஃப்ரான்ங்ஃபர்ட் தவிர ஊர்சுற்ற ஆரம்பிக்கவில்லை. திட்டம் இருக்கிறது. விரைவில் பகிர்கிறேன்.

விதவிதமான பானங்கள் கிடைக்கின்றன். இது இங்கே 'குடி'சைத் தொழில் போலும். பெயர் எல்லாம் அவர்கள் மொழியிலேயே இருப்பதால், எது விஸ்கி, ஓட்கா, ஒயின் , பீர் எனத் தெரியவில்லை. நமக்கு அது தேவையில்லை என்பதால் விட்டுவிட்டேன்.(பகிர்ந்தது பொதுநலன் சேவை கருதி) ;)

காஸ்ட் ஆஃப் லிவிங் அதிகம். சரக்கைத் தவிர்த்து எல்லாப் பொருட்களும் விலை அதிகம். மெக்டொனால்ட்ஸ் இருக்கிறது.நேற்றுதான் கேஃஎஃப் சியைக் கண்டுபிடித்தேன்.

இன்று காலை போகவேண்டிய பார்க் இது. தூங்கிவிட்டதால் மதியம் சென்றேன். ஆர்டிஸ்ட் பென்னில் வரைந்தது. ஒன்றரை மணிநேரம்.

பார்த்து ரசித்தமைக்கு நன்றிகள்....

நிறைய பல்புகள் சுவாரஸ்யமான நிகழ்வுகள் இருக்கின்றன பகிர்வுக்கு,

இப்பதிவு ஓவிய ரசிப்புக்கு என்பதால் பின்னர் சொல்கிறேன்.

இன்னொரு விஷயம், ப்ளாக்கருக்கு தீபாவளி சட்டை போட்டுவிட்டேன். புது டெம்ப்ளேட் எப்படியிருக்கிறது என நேரங்கிடைத்தால் பார்த்துவிட்டு ஃபீட்பேக் சொல்லுங்கள்....:)

ரோம்பெர்பெர்க்-பிரான்க்பார்ட் -Sketch -23 OCT 2011

2011-10-23T17:49:00.010+05:30

ஜெர்மனி வந்த நாள்ள இருந்து இந்த நாள் வரை கடுமையான ஜலதோஷம், கூடவே காதல் போலக் காய்ச்சலும் ..(உள்ள இருந்து படுத்தி எடுக்குது, வெளிய யாருக்கும் தெரியலை).ஆபீஸ், ஹோட்டல் ரூம், ட்ரைன் மற்றும் ஷாப்பிங் மால் தவிர எல்லா இடத்துலயும் குளிர் கொல்லுது. வந்து இறங்கினப்போ பத்து டிகிரி இருந்தது. போகப் போக தேமுதிக செல்வாக்கு மாதிரி குறைஞ்ச கிட்டே இருக்குது.

muukku சிந்திச் சிந்தி அது காணாமப் போகாததுதான் மிச்சம்,,,(அது போகாது, இன்னும் ஏகப்பட்ட பேர்கிட்ட நோஸ்கட்வாங்க வேண்டி இருக்குதே..;) )

நேத்து புல்லா தூங்கியே கழிச்சாச்சு...இன்னைக்குக் காலையில சீக்கிரம் பத்து மணிக்கெல்லாம் எழுந்து இந்த இடத்துக்குத்தான் போனோம்.இது முனிசிபாலிட்டி பிள்டிங்க்காம் , ரெண்டாவது உலகப் போர் அப்ப , மேயர்கள் மற்ற உறுப்பினர்கள் எல்லாம் இங்கதாn ரகசிய மீட்டிங் போட்டாங்களாம். அப்புறம் இங்கு குண்டு போட்டாங்களாம். அதுக்கப்புறம் புதுசா நிர்மாணம் செய்தார்களாம்...என் நண்பன் சொல்லக் கேள்வி. அங்கு எல்லாமே ஜெர்மன் மொழியிலையே எழுதி இருக்காங்க...அட்லீஸ்ட் மதுரைத் தமிழ்ல கூட எழுதி வைக்கலை. விக்கிப்பீடியாவில பார்த்தாலும் ஜெர்மன் தான்...:(

இந்த இடத்தைத் தாண்டிப் போனால் 'ரெயின்நதி வருகிறது....

இந்தக் கட்டிடத்திற்கு நான் போன நேரம் பதினோரு மணி இருக்கும். வரைய ஆரம்பித்த கொஞ்ச நேரத்தில் என் அருகில் ஒரு ஜென்டில் மேன் வந்தார் தொப்பியுடன். சுற்றும் முற்றும் பார்த்துவிட்டு தொப்பியைக் கீழே வைத்துவிட்டு முழங்கால் போட்டு அமர்ந்தார்....ஒ ஒ... நம்ம ஒர்க்குக்கு 'HATS OFF' சொல்கிறாரோ சிம்பாலிக்காக என்று நினைத்தேன். பின்புதான் தெரிந்தது, அவர் பிசினசிற்காக கல்லாவைத் திறந்திருக்கிறார் என. (அது சர்ச் வாசல். நிறைய சில்லறை தேரும்) இதைப் பார்த்துப் பதறிய என் நண்பன் என்னைச் சுற்றிலும் ஏதும் டப்பா இருக்குதா என செக் செய்துவிட்டு இல்லைஎன்ற பிறகுதான் பெருமூச்சு விட்டான்..,(இருந்திருந்தா அட்லீஸ்ட் ஒரு பர்கருக்காவது தேறி இருக்கும்...:( )

நேற்று புதிதாக சில pens வாங்கினேன்... அதை முதல் முறையாக உபயோகித்து வரைந்தது... தொண்ணுறு நிமிடங்கள் செலவானது...

பி.கு: என் ஹெச் எம் இல்லை., தமிழ் எடிட்டரில் காப்பி செய்து பேஸ்ட் செய்ய முடியவில்லை.... அதனால் இந்த 'ஜாக்கி'த தமிழை மன்னிக்கவும்....

ஸ்கெட்ச் க்ராவ்லர்ஸ் பெங்களூர் ஷாப்பிங்

2011-10-15T22:05:00.000+05:30

காலைல முக்கியமான ஷாப்பிங் போகணும்,. இன்னைக்கு முழுக்கவே ஷாப்பிங்தான் ப்ளான்.ஆனாலும் கொஞ்சம் நேரம் கிடைச்சது. அதனால ‘ஸ்கெட்ச் கிராவ்ல்’ நிகழ்வுக்குப் போயிட்டேன்.Sketch crawlerss ந்றது, உலகம் முழுக்க எல்லா ஓவியர்களும் ஏதாவது ஒரு இடத்துல ஒண்ணு கூடிக்
கும்மியடிச்சிட்டு, கொஞ்சம் கிறுக்கிட்டு ஸ்கெட்ச் கிராவ்லர்ஸ்க்கான இணையதளத்துல அப்லோட் பண்ணனும்.இது மூணுமாசத்துக்கொருக்கா ஏதாவது ஒரு சனிக்கிழமை நடக்கும்(அனேகமா ரெண்டாவது சனிக்கிழமையா
இருக்கும்).

ஏன் அங்க போக முடிவெடுத்தேன்னா, அது பிரிகேட் ரோடு. என் ஷாப்பிங்கையும் அங்க முக்கால்வாசி முடிச்சிடலாம்.ஆடு மேய்ச்ச மாதிரியும் ஆச்சு; அண்ணனுக்குப் பொண்ணு பார்த்த மாதிரியும் ஆச்சுன்ற கதையா முதல்ல ஸ்கெட்ச் கிராவ்லர்ஸ் நிகழ்வுக்குப் போனேன். இது போன்ற நிகழ்வில் நான் கலந்து கொள்வது இரண்டாவது தடவை. நடுவில் ஒரு முறை ஒர்க்‌ஷாப் ஒன்றிற்குச் சென்றதால் மிஸ் ஆகிவிட்டது. ஆறேழு பேர் வந்திருந்தாங்க.பிரிகேட் ரோட்டில இருக்க ஓபரா ஹவுஸ்தான் டார்கெட். ஆனா இன்னிக்கு ஓவர் வெயில் அஜித்தைப் பொளந்துருச்சு. அதனால கூலா அதுக்கு எதிர்த்தாப்புல இருந்த மால்ல ‘கபே காபி டே’ க்குள்ள தஞ்சம் புகுந்துட்டோம். பென் மட்டும்தான் இருந்தது. அதிலயே அட்ஜஸ்ட் பண்ணி இந்த ரெண்டு படத்தைப் போட்டுட்டேன்.

மதியம் பிஸ்ஸா ஹட் போனா, கல்யாண வீட்டு அப்பளம் சைஸுல இருக்கிற ‘வெஜ் சுப்ரீமோ’ லார்ஜ் க்கு (மூணு பேர் சாப்பிட்டோம்), 600 ரூபா பில்லப் போட்டுட்டான் வக்காளி. பிட்சர் வேணுமான்ன்னு கேட்டான். ‘டேய் நான் சொன்னது செவன் அப்’ டான்னேன். எனக்குத் தெரிஞ்சது ‘பிட்சர்’னா பீர் தான். அப்புறம்தான் புரிஞ்சது ‘பிட்சர்’னா பெரிய ஜாடியாம். அது ஃபுல்லாக் கொடுப்பானுங்களாம் கூல் ட்ரிங்க்ஸை.

நண்பர்களின் ஆலோசனையோடு புதுக்கேமரா வாங்கியாச்சு. மயில் மற்றும் உமாநாத் செல்வனுக்கு நன்றிகள். அவர்கள் சொன்னது சோனி. ஆனா அது 10 மெகாபிக்சல். அதான் நான் கேனான் 14 மெகாபிக்சல் கேமரா வாங்கிட்டேன். 5 X ஜூம்.விலை ஏழாயிரத்துக்குக் கொஞ்சம் கீழே. முதல் ஃபோட்டோ திருஷ்டி கழிக்கிறதுக்காக சேல்ஸ்மேன் என்னையே எடுத்தாரு. அதனால அத என் டெஸ்க்டாப்ல வச்சிருக்கேன். வெளியாள் பார்வைக்கு அனுமதியில்லை.

ஏகப்பட்ட ஷாப்பிங் இன்னைக்கு. ஒரே ஆள் நான், டூவீலர்ல வச்சுக் கொண்டு வரமுடியல. இதுக்கு ரெண்டு தீர்வு இருக்கு. ஒண்ணு கல்யாணம் பண்ணனும் இல்ல கார் வாங்கணும். இன்வெஸ்ட்மெண்ட் காஸ்ட்,மெயிண்டெனன்ஸ் செலவு ரெண்டும் வச்சுக் கம்ப்பேர் பண்ணிப்பார்த்தா கார் வாங்குறதுதான் பெட்டர்னு தோணுது. என்னலே நாஞ்சொல்றது சரிதானே....???!!!!

ஏன்ப்பா பஸ்ஸை ஷெட்டுல போட்டுப் பூட்டப் போறாங்களாமே அது உண்மையா? :( சரி சரி அடுத்து வர்ற ஹை டெக் ட்ராவல்ஸ்ல (கூகிள்+) ஏறி இடம் பிடிச்சுக்குவோம்....

ஐம் காலிங் ஃப்ரம் ஹெச் எஸ் பி ஸி பேங்க்....

2011-10-12T20:11:00.004+05:30

ட்ரிங் ட்ரிங்...

ட்ரிங்...ட்ரிங்.....(மக்களே நான் சொன்னேன்னு யாரும் சரக்கடிக்கப் போயிடாதீங்க...இது ஃபோன் அடிக்கிற சத்தம்....)

ரிசீவரை எடுத்தேன்.

‘ஹலோ’

‘ஹலோ...இட்ஸ் நிஷா. காலிங் ஃப்ரம் ஹெச் எஸ் பி ஸி பேங்க்..ப்ளா ப்ளா ப்ளா...’

ஆரம்பிச்சிட்டாய்ங்க இன்னைக்கும்.ஹ்ம்ம்...
பொண்ணுங்கன்னா ஓவர் பேச்சுத்தான். அதான் கால் செண்டர்ல வேலைக்கு எடுக்குறாய்ங்க போல.

எப்பவாவதுனா பரவாயில்லை. டெய்லி காலைல , சாயந்திரம் ரெண்டு தடவை அதே பேங்குல இருந்து ஃபோன் வரும். என்னய்யா உங்க பஞ்சாயத்துன்னு ஹிங்கிலீஸ்ல கேட்டா, ‘அசோக் சார்..உங்க கிரெடிட் கார்டு’னு ஆரம்பிச்சிருவாய்ங்க.

கடந்த ஆறு மாசமா இதே வேலைதான்.
பொறுமையா சொல்ல ஆரம்பிச்சேன்..’ப்ளீஸ் ஹோல்டான்...!நான் அசோக் இல்லை. பரணி. அவர் உட்கார்ந்திருந்த இடத்துல, நான் இருக்கேன். அவர் டெஸ்க் மாறிப் போயிட்டாரு.அவரோட எக்ஸ்டென்ஷன் நம்பர் இதுன்னு’ நாலு நம்பர் சொல்ல ஆரம்பிக்கிறதுக்குள்ளயே ,’தேங்க் யூ’ன்னு ஃபோனை வச்சிடுவாய்ங்க.

பலசமயம் நான் சீட்லயே இருக்கமாட்டேன். அதனால ஃபோனும் நான் அட்டெண்ட் பண்றதில்லை.

இருந்தும் தொல்லை அதிகமாயிடுச்சு.அப்புறம்தான் ஒரு ஐடியா பண்ணேன்.
எப்பக் கூப்பிட்டாலும், தமிழ்ல மட்டும் பேச ஆரம்பிப்பேன்

‘ஹலோ...இட்ஸ் பூனம். காலிங் ஃப்ரம் ஹெச் எஸ் பி ஸி பேங்க்..ப்ளா ப்ளா ப்ளா...’

‘சொல்லுங்க என்ன வேணும்?’

‘சார்...’

‘சொல்லும்மா என்ன வேணும்?’

‘சம்ஜா நஹி சார்’

ஃபோன் கட்...

‘ஹலோ...இட்ஸ் மாத்ரி. காலிங் ஃப்ரம் ஹெச் எஸ் பி ஸி பேங்க்..ப்ளா ப்ளா ப்ளா...’

‘சன் டிவியா?’

‘சார்’

‘எந்திரன் படத்துல இருந்து ‘கிளிமஞ்சாரோ’ பாட்டு போடுங்க’

‘சார்..க்யா பாத் கர் ரே சார். சம்ஜா நஹி(ன்)’

‘அதாம்மா தாத்தாவும் பேத்தியும் டூயட் பாடுவாங்களே. அந்தப்பாட்டு’

ஃபோன் கட்...

அப்புறம் அப்பப்போ என்ன தோணுதோ, சூரியன் எஃப் எம், கோடைப் பண்பலை இப்டி அடிச்சு விடுவேன்...

ஆனா அவிங்களும் ஓயமாட்டேங்கிறாய்ங்க. இப்பவும் கால் வருது...

அந்த இடத்துல இருந்த அசோக், ரொம்ம்ம்ம்ம்ப நாளா நச்சரிச்சு , போன வாரம்தான் முடிச்சிக் கொடுத்தேன் இந்த போர்ட்ரெயிட்டை...வட இந்தியர்...

ஸ்டெட்லர் 8பி பென்சில் இன் நைட்டிங்கேல் ஆர்ட் ஷீட்...

வெல் விஷர்

2011-10-11T20:16:00.004+05:30

இதுவும் முந்தைய படங்களைப் போலவே ஆனந்தவிகடனில் இருந்து எடுத்ததுதான்.நன்றி ஆனந்தவிகடன்....!
வாட்டர்கலர் ஆன் வாட்டர்கலர் பேப்பர் ஏ4 சைஸ்....

பார்த்து ரசித்தமைக்கு நன்றிகள்....!

புத்தம்புதுக்காலை... பொன்னிற வேளை...

2011-10-10T21:08:00.004+05:30

முழுவதும் சில்-அவுட் எஃபக்ட் கொண்டு வரமுடியவில்லை. முடிந்தளவு அந்தக் காலையையும், பறக்கும் தூசியையும் கொணர்ந்ததில் திருப்தி. மைல்ஸ் டூ கோ...

ஆனந்தவிகடனுக்கு நன்றி.புகைப்படமெடுத்திருந்த பத்மநாபனுக்கும் நன்றிகள்...!
வாட்டர்கலர் இன் வாட்டர் கலர் பேப்பர், ஏ4 சைஸ்...!

பார்த்து ரசித்தமைக்கு நன்றிகள்....!

காத்திருந்தேன் தனியே....

2011-10-10T06:26:00.005+05:30

காத்திருந்தேன் தனியே....

வீட்டில் ரெஃபரன்ஸ் படங்களுக்காக பழைய விகடன் இதழ்களில் தேடியபோது கிடைத்த படம் இது. ஆனந்தவிகடனுக்கு நன்றி...!வாட்டர் கலர் இன் வாட்டர் கலர் பேப்பர். ஏ4 ஷீட்...

பேலட்டில் வண்ணங்களை ஒருமுறை லோட் செய்தால் அது தீர்ந்தால் அடுத்து லோட் செய்ய சோம்பேறித்தனம். அதனால் முதல்முறை வண்ணங்கள் கலக்கியபின், அதிலிருந்தே புதுப்புதுக் கலவைகளை உருவாக்கி ஒப்பேற்றிவிடுவது வழக்கம்:(

எங்க வீட்டுக் குட்டியின் அலும்புகளையும் மீறி ஓவியம் ஓரளவுக்கு நன்றாக வந்ததில் மகிழ்வே...:)

பார்த்தமைக்கும், ரசித்தமைக்கும் நன்றி....!

ரொமான்ஸ் டைம் ஓடிக்கோ ஒளிஞ்சிக்கோ

2011-09-29T22:15:00.000+05:30

அன்றொருநாள் நீ வீசியெறிந்த புன்னகையில் தவங்கலைந்த கூழாங்கல்லொன்று ஆற்றைச் சீண்டத் தொடங்கியது# I witness

மல்லிகைப் பூக்களை நெருக்கமாகக் கட்டத் தெரியாததால், தலையில் தட்டிய உன் அம்மாவை நம்புகிறேன் நான். தைரியமாகச் சொல்லிவிடு

வெயில்காலங்களில் நீ ஜன்னலை மூடுவதில்லை. காற்றுக்கும் வியர்ப்பதில்லை# நீ ஏசி. நான் உன் ஃபேன்

நான் கோயில்களுக்குச் செல்வது சாமி பார்க்க அல்ல. சிலைகள் பார்க்க மட்டுமே. பின்னொருகாலத்தில் சிலை மட்டுமே பார்க்க ஆரம்பித்தேன்.

முன்பெல்லாம் மணிக்கணக்கிலும் இப்போது மவுனக்கணக்கிலும் பேசிக்கொண்டிருக்கிறோம்#முத்திப்போச்சு

உனது ஓவியமொன்று தூரிகையில் வரைந்து கொடுத்தேன்.அதைத் தடவிப் பார்க்கிறாய்.விரல்களால் மேலெழும்புகிறது இன்னொரு ஓவியம்

மூக்குத்தி அழகாயிருக்குமா கேட்டாய். உனக்கழகு என்றேன்.வளையல் அழகாயிருக்குமா கேட்டாய். உனக்கழகு என்றேன். தாலி என்றாய். நமக்கழகு.நீயே சொல்லிவிட்டாய்#முந்திரிக்கொட்டை

நீ கோலமிடுகையில் கூட புள்ளி வைப்பதை விரும்பவில்லை.அத்தனையையும் கமாவாக மாற்றிக் கொண்டிருக்கிறேன்#வேற வேல

நமது ஆற்றங்கரைச் சந்திப்புகளுக்கு மட்டும் நீ வெட்கத்தையும், நான் தைரியத்தையும் எடுத்துவருவதில்லை.#ச்சே மிஸ்ஸாயிடுச்சு என வருத்தப்படுது பார் குளம்

டிஸ்கி: இடம்பெறும் கவிதைகளும், ஓவியங்களும் பரீட்சார்த்த முயற்சிகளேயன்றி யார் உயிருக்கும் தீங்கு விளைவிப்பதற்கல்ல. புரிதலுக்கு நன்றி....!

எங்கேயும் எப்போதும்-எனது பார்வை

2011-09-28T00:33:00.002+05:30

என் பார்வையில மட்டுமில்ல, எல்லோர் பார்வையிலயும் அஞ்சலி கொள்ளை அழகு...:)))
கற்றது தமிழ் ஆனந்தியை (நெசமாத்தான் சொல்றியா..??!!!)இன்னும் மிஞ்சமுடியவில்லை...
இவ என் பக்கத்துவீட்டுப் பொண்ணுங்க...
Reynolds black pen in A5 sketch book-one hour
ஒரே ஒரு இடைஞ்சல் , கன்னம் ,உதடு வரையுறப்போ கொஞ்சம் வெட்கப்பட்டேன்...:)))
பார்த்தமைக்கும்,ரசித்தமைக்கும் நன்றி....!

நக்மாவும் சிக்மாவும்

2011-09-22T21:19:00.000+05:30

         நக்மாவைப் பத்திமட்டுமே தெரிஞ்ச என்னை மாதிரி ஆளுங்களுக்காக சிக்மாவைப் பத்தியும் சொல்லிக் குடுத்தாங்க போனவாரம்.ஒன்பதரைக்கு ஆரம்பிச்ச ட்ரைனிங் ஆறு மணிக்குத்தான் முடிஞ்சது.ஒரு நா, ரெண்டு நா இல்ல அஞ்சுநாளக்கி.அதுல அண்ணன் கொஞ்சம் அஃபீசியலான பெர்சனல் வேல இருந்ததால ரெண்டுநாளக் கபளீகரம் பண்ணிட்டேன்.

         ட்ரைனர் அமெரிக்கக்காரர். நம்ம நாட்டாமைக கைல எப்பவும் சொம்பு வச்சிருக்க மாதிரி இவர் கைல ஒரு பெரிய கப்போஃபிளாஸ்க்(பெரிய கப்பு மாதிரியும், சின்ன ஃப்ளாஸ்க் மாதிரியும் இருந்ததால இந்தப் பேர் வச்சேன்) எப்பவுமே வச்சிட்டிருந்தார்.அதுக்குள்ள காபிதான் இருக்குன்னு அவர் முன்னாடியே சொல்லிட்டதால, என்னோட விபரீதக் கற்பனையெல்லாம் ஓரங்கட்டிட்டேன். பத்து நிமிஷத்துக்கொரு தடவை அந்த கப்போஃப்ளாஸ்க்குக்கு முத்தம் கொடுத்துட்டே இருந்தாரு.(அட அதுக்குள்ள எவ்வளவுதான் குடிச்சாரோ தெரியலை).

        இதுக்கு முன்னாடி எனக்கு சிக்மாவைப் பத்தித் தெரிஞ்சது எல்லாம் ஒரு பெரிய மய... இல்லை பெரிய மலை....அதாங்க BELL CURVE தான்.அதையே கொஞ்சம் கொஞ்சமா ஆரம்பிச்சு, உள்ள பூந்து வூடுகட்டி அடிக்க ஆரம்பிச்சாரு.ஒருச்சாமி, ரெண்டுச்சாமி,மூணுச்சாமி......ஆறுச்சாமி மாதிரி... ஆறு சிக்மா (SIX SIGMA) தான் குறிக்கோள். அதை அடைஞ்சிட்டோம்னா வீடு பேறு அடைஞ்சிடு.... இல்ல நல்ல குவாலிட்டியான ப்ராடக்ட் கொடுக்கலாமாம். எனக்கு இதில் அவ்வளவாக நம்பிக்கை இருந்ததில்லை.ட்ரைனிங் கலந்துக்கிட்ட பிறகு கொஞ்சம் தெளிவாயிருந்தேன்.(கொசுறு: இதுல பயிற்சியெடுத்துக்கிட்டா ஓடு, செங்கல் எதுவும் ஒடைக்காமயே ப்ளாக்பெல்ட் வாங்கிடலாமாம், அரசியல்வாதிங்க டாக்டராகுற மாதிரி)

நாம எப்பவும் உக்காந்துருக்கது கடைசி பெஞ்சுலதான். அப்பத்தான் ஏர்டெல்காரன் ஃபோன் பண்ணி காலர்ட்யூன் செட் பண்றதுக்குக் கூப்பிட்டாக்கூட ஈஸியா எழுந்து போயி டீ, காபி, டிபன் சாப்பிட வசதியாயிருக்கும்.(சாப்பிட்டு வந்ததும் கொஞ்சம் அசதியாவுமிருக்கும்).இதுக்கு முன்னாடி GD&T ட்ரைனிங்ல எல்லாம் ஒரு மணி நேரத்துக்கு ஒரு பிரேக் வரும். இவரு என்னடான்னா காலையில ஆரம்பிச்சா,மதியம் ஒரு மணி ஆனாக்கூட ப்ரேக் விடமாட்டேங்குறாரு. அதனால பதினொரு மணிக்கு எவனாச்சும் ‘ப்ரேக்’னு ஆரம்பிப்பான். இவரும் நம்ம ஊர் மினிபஸ் கிளம்புறமாதிரி ‘ப்ரேக்’,’ப்ரேக்’னு சொல்லிக்கிட்டே ஒரு அரைமணிநேரங்கழிச்சு ப்ரேக் தருவாரு. பத்துநிமிஷம்தான்.

     ஒரு தடவை பேப்பர்க்ளிப்பைக் காட்டி இத வேற எப்டில்லாம் உபயோகப்படுத்தலாம்னு வர்ற ஐடியாக்களைச் சொல்லச் சொன்னாரு. ரெண்டுநிமிஷம்தான் டைம்.எனக்கு வந்தது அரசின் கு.க திட்டம் போல ரெண்டே ரெண்டு. ஒண்ணு, அத ஹேர்கிளிப்பா(எவ்ளோ ரொமாண்டிக்கான ஆளு நானு) யூஸ் பண்ணலாம், இன்னொண்ணு, அத நேராக்கி, ஹோட்டல்ல பில் சொருகுற கம்பி மாதிரி யூஸ் பண்ணலாம்(காரியத்துல கண்ணு). அதுக்கு மேல ம்ஹூம். நம்ம கூட்டத்துல ஒருத்தர் எந்திருச்சாரு. பன்னெண்டு ஐடியா கொடுத்தாரு.(உபதகவல்:அவருக்கு போன வருஷமே ஐடியாமணி என நான் பெயர் வைத்து,என் நண்பர்களுக்குள் அவரைக் குறிக்கும்போதெல்லாம் ‘மணி’ எனத்தான் சொல்லிக்கொள்வோம்).ஒண்ணுமில்ல...நான் கொடுத்த ரெண்டாவது ஐடியாவை மட்டும் அவர் பிரிச்சு மேஞ்சிருக்காரு. பேப்பர்க்ளிப்பை கம்பி மாதிரி நீட்டி அதுக்கப்புறம், பேப்பர் குத்தலாம்,காது கொடயலாம், பல்லு குத்தலாம்,முதுகு சொறியலாம் ரேஞ்சுக்குக் கொடுத்தாரு.ஐடியாமணின்னு நான் வச்ச பேரு சரிதானே....

நாம ப்ராபளம் சால்வ் பண்றதுக்கே நாலைஞ்சு வழிகள் சொன்னாரு. ஒண்ணு நார்மல் பிரெய்ன் ஸ்டோர்ம், இன்னொண்ணு, ரிவர்ஸ்னு ஏதோ சொன்னாரு மறந்துடுச்சு, இன்னும் ரெண்டு பேரு சொன்னாருங்கோ.தமிழ்லன்னா ஈஸியா ஞாபகம் வச்சிருப்பேன். அவர் அமெரிக்கர் வேற, இடுப்புல சப் டைட்டில் இல்லாமப் பேசுறதால குத்துமதிப்பா அவதார் படம் பாக்குற எஃபக்ட்லதான் இருந்தேன். அவர் கொடுத்த ஒரு ப்ராப்ளம் ,’ஸ்பீடோ மீட்டர் இல்லாம வண்டில வேகம் எப்டிக் கண்டுபிடிக்கிறதுங்கிறது’. ஆக்சுவலா நோக்கம் என்னன்னா, சொல்யூசன் பத்திக் கவலைப்படக்கூடாது. ஐடியா ஜெனரேட் பண்றதுதான் முக்கியம். இப்ப எல்லோருமே கிட்டத்தட்ட ஐடியாமணி ரேஞ்சுக்குப் போயிட்டோம்.அரைமணி நேரங்கழிச்சு ஒவ்வொரு டீமும் ஐடியா கொடுத்தது.
      -ஹேண்டில்பார்ல ஒரு குச்சி ஆடுற மாதிரி ஃபிக்ஸ் பண்ணிக்கணும், அது எவ்வளவு நேரம் ஆடுது...அப்டின்னு கால்மணி நேரம் ஒரு ஐடியா...

    -ஸ்பீடோ மீட்டர் இருக்க இடத்தை ஆஷ்ட்ரேவா யூஸ் பண்ணலாம்னு ஒரு ஐடியா...யோவ் முதல்ல ஸ்பீடோ மீட்டருக்கு ரீப்ளேஸ்மெண்ட் ஐடியாவைச் சொல்லுய்யான்னு சொல்லிட்டாரு ட்ரைனர்.ஆஸ்காரை அவங்ககிட்ட இருந்து பிடிங்கிட்ட ஃபீலிங்க்ல அமைதியாச்சு டீம்

   -வண்டிச் சக்கரத்துல ஒரு மேக்னடிக் வீல் பண்ணனும்(அதான் ஏற்கெனவே வச்சிருக்காங்களேய்யா....)அதுல இருந்து டேஷ்போர்டுக்கு வயர் இழுக்காம, சிக்னலை ட்ரான்ஸ்ஃபர் பண்ணி ஒரு ஈசியூ வச்சின்னு ரொம்ப எலக்ட்ரானிக்ஸா போயிட்டிருந்தது ஒரு டீமோட ஐடியா...
    இன்னும் ரெண்டு டீம் கொடுத்த ஐடியா டெக்னிக்கலாவும், சாத்தியப்படக்கூடிய வகையிலும் இருந்தது.

     ஆனா எல்லோருக்கும் பிடிச்ச ஒரு சூப்பர் ஐடியாவும் ஒரு டீம் கொடுத்துச்சு.
அவங்களோட ஐடியா,’ வண்டியை எடுத்துக்கிட்டு, ஸ்பீடோ மீட்டர் இல்லாம நேரா ஸ்பீடா மாரத்தள்ளி வரைக்கும் போகணும்.’ அப்புறம், ‘போலீஸ்காரர், வண்டி ரெஜிஸ்ட்ரேஷன் நம்பரோட வண்டியோட ஸ்பீட் எழுதித் தருவாரு’....
இதுவும் நல்ல ஐடியாதானே...

        நல்ல ட்ரைனிங்க்தான்.இப்ப எல்லாம் மறந்துடுச்சி . மறுபடியும் மெட்டீரியல்ஸ் ரெஃப்ரஷ் பண்ணனும். அப்ளை பண்ணிப்பார்த்தாத்தான் இன்னும் பலன் கிடைக்கும்....

சே-உலர்தூரிகை முயற்சி

2011-09-20T22:20:00.001+05:30

அக்ரிலிக்ஸ் ஆன் கேன்வாஸ் A4 size
tried dry brush...

தூரிகையில் விஸ்கஸாக வண்ணத்தைக் குழைத்து, அதீத நீர்மத்தன்மையை துணியில் துடைத்து அகற்றிவிட்டுப் பின், தூரிகையிலுள்ள வண்ணமனைத்தையும் உபயோகித்தது. போகப்போக உலர்தீற்றல்கள் வரும். அதன் விளைவுகளையும் பயன்படுத்திக்கொண்டு, பேப்பர்(கேன்வாஸின்) Textureஐயும் பயன்படுத்திக் கொண்டு வரையப்பட்ட சோதனை முயற்சி...

பார்த்தமைக்கும், ரசித்தமைக்கும் நன்றிகள்...

ஞாயிறு போற்றுதும்-18செப்2011

2011-09-18T22:22:00.002+05:30

ஏதாச்சும் படிச்சாலோ, அதைப்பத்தி நினைச்சாலோ விஷூவலா கற்பனை பண்ணா நல்லதுன்னு சொல்வாங்க. அது என் விஷயத்துல தப்பாயிடும் போல இருக்கு. இந்த மாதிரி விஷூவல் கற்பனைலாம் எனக்கு வண்டியோட்டுறப்போ வருது :( #நல்லவேளை பின்னாடிவர்ற வண்டில ஹார்ன் வச்சிருக்கானுங்க

ட்ராஃபிக் அதிகம் இல்லேன்னாலும், ரெட் லைட் போட்டா நிற்பது என் பழக்கம். ஆனா பின்னாடி உள்ள மகராசங்களுக்குப் பொறுக்கமாட்டேங்குது போல. ஓவர்டேக் பண்ணி, ‘கியா யார்’ நு கிண்டல் பண்ணிட்டுப் போறான்.சமநிலையைக் குலைப்பதற்கென்றே பிறவியெடுத்து வருகிறார்கள் போலும். #

இன்னைக்கும் அல்சூர் ஏரிதான் பென்சில்ஜாம் நிகழ்வு.ஏகப்பட்ட பேர் வந்திருந்தாங்க. ஒன்றரை மணிநேரம் வரைஞ்சேன்னா, ரெண்டுமணி நேரம் அடுத்தவங்களோட படைப்புகளைப் பார்ப்பதற்கும், என் படைப்புகளைக் காண்பிப்பதற்குமே போய்விட்டது. #exhibitionism??? its important for some time ,for some work

இன்னைக்குக் கண்ட்ரோல் இல்லாம ரொம்ப லூசாத்தான் வாட்டர்கலர் பண்ணினேன்.(என்னது நான் பண்றது எல்லாமே லூசுத்தனம்தானா?pls mute ur mind voice)..வழக்கம்போல் திருப்தி தரவில்லை. எனினும், i feel better with this.

மதியம் அங்கேயே இன்னொரு நிகழ்வு. ஃபேஸ்புக் ஓவியக்குழுமம் ஒன்று சேர்ந்து பேசுவதற்கு ஏற்பாடு செய்யப்பட்டிருந்தது. நானும் இருந்திருக்கலாம். ஆனா கோடி ரூபா கொடுத்தாக்கூட ஞாயிறு மதியத் தூக்கத்தை விடமாட்டேனெனச் சொல்லிவிட்டுக் கிளம்பிவிட்டேன்.’நந்தினி’ யில் ஹைதராபாதி சிக்கன் பிரியாணி. வீட்டுக்கு வந்ததும் ஒரு நெடுந்தூக்கம்.#மனுஷன் கண்டுபிடிச்சதிலேயே உருப்படியான ரெண்டுவிஷயம் பிரியாணி அதுக்கப்புறம் ஸ்வீட் பான்

என் அப்பார்ட்மெண்ட்ல நான் இருக்கது என்னைத் தவிர யாருக்கும் தெரியாதுன்னு நினைச்சிக்கிட்டிருந்தேன் இப்பவரைக்கும்.இரவு உணவை லைட்டா முடிச்சிக்கிடலாம்னு கடைக்குப் போய் தயிர் வாங்கிட்டு வந்தேன். வீட்டைத் திறக்கறதுக்குள்ள, எதிர்வீட்டுல இருக்க ஹிந்தி ஆண்ட்டி கூப்பிட்டாங்க. அங்க வெளியே சீரியல் லைட்லாம் போட்டு, வீடே கோலாகலமா இருந்தது. சுவரில் ‘happy birthday to JASMINE' னு போட்டிருந்தது. அவங்க பொண்ணுக்கு பிறந்தநாளாம். ஸ்வீட் சாப்பிடக் கூப்பிட்டாங்க.கூச்சத்துடன் சென்றேன்.வரும்போது, ஒரு பெரிய ப்ளாஸ்டிக் தட்டில் சிக்கனுடன் சாப்பாடும் கொடுத்து அனுப்பிவிட்டார்கள்.எதிர்பாராத அன்பில் கொஞ்சம் திக்குமுக்காடித்தான் போனேன். எங்கள் ஊரில் நான் வீட்டில் இருக்கும்போது பக்கத்து லாட்ஜ் ஒன்றில் நிரந்தரமாகத் தங்கியிருந்த பேச்சிலர் வாத்தியார்கள் நினைவுக்கு வந்தது. நல்லநாட்களில் பக்கத்துக் கோயிலிலிருந்து பொங்கல் பிரசாதங்கள், எங்கள், அண்டை வீடுகளிலிருந்து சாப்பாடும் அவர்களுக்குப் போகும். அவர்கள் எவ்வளவு ம(நெ)கிழ்ந்திருப்பார்கள் என இன்று எனக்கு நினைவுக்கு வந்தது.(பதிவு கொஞ்சம் ஜாக்கி பதிவு மாதிரிப் போயிடுச்சோ??? ! ) விடுங்க...அன்பால் சுழலும் உலகமிது. திரைகள் மூடி நாகரிகம் காட்டுவதைவிட, வெளிக்கொட்டும் பேச்சுக்கள் எவ்வளவோ மேல்....

நீ பாதி நான் பாதி கண்ணே...!

2011-09-17T22:08:00.001+05:30

கார்த்திக்கின் திருமணத்தில்(01செப்2011) கொடுக்க மிஸ் செய்துவிட்டேன். இப்போதுதான் முடித்தேன்.
ஏன் இந்தத் தலைப்புன்னா? அவங்க நிச்சயதார்த்தத்துல ஆர்கெஸ்ட்ராவே இவங்கதான். ரெண்டுபேருமே உண்மையிலேயே நல்லாப் பாடுவாங்க. அவங்க பாடின பாட்டுதான் இது ‘நீ பாதி நான் பாதி கண்ணே...!’ கரோகில மியூசிக் செட் பண்ணியிருந்தாங்க.
ஒன்ஸ்மோர் கேட்டுக்கேட்டு 4 தடவை பாடுனாங்க.
விரைவில் பஸ்ஸில் அந்த வீடியோ கிடைத்தால் போடுகிறேன்.
அன்னைக்கு நிச்சயதார்த்தத்துக்கு, காம்ப்பையரிங் ஐயாதான்... அது பட்டையக் கிளப்புனது தனிக்கதை :)

இந்தப்படம் A2 size கார்ட்ரிட்ஜ் பேப்பரில் 8 ஸ்டெட்லரில் பண்ணியது...
பொண்ணுங்களா...கொஞ்சம் நகையைக் கம்மியாப் போடுங்க...பட்டுப்புடவை, நகைலாம் எஃபக்ட் கொண்டு வரக் கஷ்டமா இருக்குதுல்ல...:(

மாப்பிளையைப்பாருங்க சிம்பிளா ஒரு ஷர்ட்....
பார்த்தமைக்கும், ரசித்தமைக்கும் நன்றிகள்...

வெள்ளையடித்தல் ஞாபகங்கள்

2011-09-16T21:51:00.002+05:30

டவுசர் பருவத்தில் தீபாவளியை விட ஆர்வமூட்டும் நாளொன்று உண்டு. அது வீட்டுக்கு வெள்ளையடிக்கும் தினம்.நீலமும், கல்சுண்ணாம்பும் கலந்த வாடை அப்படியொன்றும் உவப்பானதாயிருந்ததில்லை எனக்கு.ஆனாலும் எங்கெங்கோ மூலையில் பதுங்கிய பொருட்கள் அன்றுதான் தரிசனத்திற்கு வரும், திருவிழாவில் மட்டும் கண்டுபிடிக்கப்படும் தாவணிகள் போல.விஐபிக்கள் இல்லாத நாட்களில் மூலையில் சிவப்போ, பச்சையோ அடிக்கப்பட்டு இருக்கும் கண்கவர் ட்ரெங்குப் பெட்டிகளும், கட்டம்போட்ட சூட்கேசுகளும்தான் எனது இலக்கு.நானும் என் தம்பியும் துழாவுவதற்கு வாட்டமாக பெரிய ‘குளுக்கை’ போன்ற ட்ரம் ஒன்று இருக்கும்.எங்கள் தாத்தா வாங்கிய பழைய பொருட்கள்,சேமித்த புத்தகங்கள், வால்வ் டைப் ரேடியோவின் விளக்க மேனுவல்,பழைய லைட்டர்கள் இன்னும் பல ஐட்டங்கள் தேடுதலில் அகப்படும்.புதிய புத்தகவாசனை எவ்வளவு இதமோ, கிட்டத்தட்ட அதே போன்றதொரு அனுபவம் தருபவை கரையான் அரித்த பழைய புத்தகங்களும். தாத்தா தீவிர திமுக என்பதால், அவருக்கு வந்த வாழ்த்து அட்டை எல்லாவற்றிலும் இளைஞர் முதல் கிழவர் வரை கலைஞரே சிரித்துக் கொண்டிருப்பார்.தாத்தாவின் வெறி எங்களையும் தொற்றிவிட்டிருந்தது. கலைஞரின் புகைப்படம் பார்த்தாலே ஒரு தனி உற்சாகம் வந்துவிடும்(இப்போது தலைகீழ்). சிறுவயதில் நான் கிறுக்கிய சாக்பீஸ் உருவங்களில் அதிகம் வருபவர் கலைஞர்தான்.முரசொலியின் பொங்கல்மலர்கள் கிடைக்கும். எப்போதோ ஒருமுறை தாத்தா பெங்களூர் சென்றிருந்தபோது எடுத்த படம் கிடைத்தது.அவருக்குக் கொஞ்சம் முடிவளரும் என்றாலும், மொட்டையடித்துக் கொள்வதை வழக்கமாக வைத்திருப்பார்.அதற்கு காட்டுராஜா கடைக்குத்தான் செல்வார்.அதற்கென பிரத்யேகமாக முடிபிடுங்கும் மெஷின் வைத்திருப்பார்.

ஒவ்வொரு வருஷமும் இந்தத் தேடல் தொடரும். நான் பதினொன்றாம் வகுப்புப் படிக்கையில், கிறிஸ்துமஸ் அன்று தாத்தா விரும்பி இறந்துவிட்டார்.முதல்நாள் இரவு ஏதோ ஒரு நினைவில் வீட்டு உத்திரத்தைப் பார்த்துக் கொண்டிருந்தேன். ‘என்னடா! நாளைக்கு நான் கிழக்க போகப் போறேன்னு பார்க்கிறியா?’ என்றார். ‘இல்ல தாத்தா. சும்மாதான்’ எனக்கூறினேன்.(கிழக்கில்தான் எங்கள் ஊர்ச் சுடுகாடு இருந்தது). அவர் கேட்டது எனக்கு அதிர்ச்சியில்லை. அவர் அடிக்கடி இப்படிக் கேட்பவர்தான்.படுத்திருப்பார்.தண்ணீர் கொண்டு வரச் சொல்வார். படுக்கையில் இருந்தவாறே, வாயில் ஊற்றச் சொல்வார். அதே போல் செய்தால், ‘ நாளைக்குப் பால் ஊத்துறதுக்கு இப்பவே ட்ரைனிங்கா?’ எனக்கேட்பார் சிரித்துக்கொண்டே. சிலசமயம் என்னையும், தம்பியையும் கூப்பிட்டு, என்னை தலைப்பக்கமும், அவனைக் கால்பக்கமும் அமரச் செய்வார்.’நாளைக்கும் இப்டித்தான் உட்காந்திருக்கணும். மலர் மாமனை பத்தி பிடிச்சிட்டு வரச் சொல்லு’. ‘போங்க தாத்தா’ என வெட்கத்துடனும், சிரிப்புடனும் ஓடிவிடுவோம்.

   60 வயதுக்கு மேலானாலும், உடல்வாகு நன்றாகவே இருந்தது. நோய் உடலில் இல்லை. மனத்தில்தான்.இரு வருடங்களுக்கு முன்பு அம்மாச்சி இறந்த சோகம் செங்கல் செங்கல்லாகக் அடுக்கப்பட்டு, இந்தக் கிறிஸ்துமஸ் காலை அவரை மூச்சடைக்கச் செய்துவிட்டது. எங்கு வாங்கி வைத்திருந்தார் அந்தக் கயிறை எனத் தெரியவில்லை.திட்டமிடுவதை என்றுமே அவர் விரும்பிவந்தார்.என் தம்பி எழுந்து பார்க்கவில்லை முதலில் பார்த்திருந்தால் கொஞ்சம் பயந்திருப்பான். முதல்நாள் இரவு ரெண்டுமணிக்கெல்லாம், ஏணியை எடுத்து அங்குமிங்குமாக வாட்டமான இடம் பார்த்துக் கொண்டிருந்தாராம்.அரைகுறைத் தூக்கத்தில் பார்த்ததாக தம்பி சொன்னான்.அதுபற்றி அவன் விசேடமாக எடுத்துக் கொள்ளவில்லை. ஏனெனில் அவர் இதுமாதிரி ஏதேனும் பழைய பொருட்களை அவ்வப்போது பரணில் நோண்டிக்கொண்டிருப்பார்.காலையில் கதவை உடைத்துப்பார்க்கையில்தான் அனைவருக்கும் புரிந்தது.

   அவரைக் கிழக்கில் எரித்துவிட்டு, வீட்டுக்கு வெள்ளையடித்தோம்.அப்போது என் கைக்குக் கிட்டிய ஒரு சிறு கையேட்டில் அவரது கல்யாண வரவு-சிலவுக் கணக்கு இருந்தது. இன்னும் சிறு பக்கங்கள் தள்ளி, பழைய எழுத்து ஸ்டைலில்
முதலிரவு, அடுத்த இரவு அனுபவங்களைச் சுருக்கமாக, கவிதை நடையில் சொல்லியிருந்தார். முழுவதும் ஞாபகம் இல்லை.அம்மாச்சியின் அழகை வர்ணித்தும், இன்னும் சில வாசகங்களும் எழுதியிருந்தார். (இன்னொரு விஷயம் அவரின் கையெழுத்து அத்தனை அழகுவாய்ந்தது. அந்த ஸ்டைல் இன்றுவரை நான் யாரிடமும் பார்த்ததில்லை’

    ஒரு மூலையிலிருந்த இன்னொரு அலமாரியை ஒதுங்க வைக்கையில் ஒரு வெள்ளைவேட்டி சுற்றப்பட்டிருந்தது. அதனடியில் ஒரு சிறு பேப்பர், A4 வடிவில் பாதிதான் இருக்கும். அவரின் அழகுக் கையெழுத்து.ஏதோ எழுதிவைத்திருக்கிறார் என அவசரமாகப் பிரித்தோம்.

    ‘செலவுக்கு பீரோவில் இருக்கும் பத்தாயிரத்தை எடுத்துக் கொள். கரண்ட் பில், தண்ணிபில் ஒழுங்காகக் கட்டிவிடு.......
                  இவண்
               மா.தங்கராசு’

பி.கு:... தாத்தா புகைப்படம் இப்போது கைவசம் இல்லை. நினைவிலிருந்து வரைந்தது.

யாருப்பா இந்த காபா???

2011-09-12T19:58:00.001+05:30

எனது புது ஃபேஸ்புக் அக்கவுண்டின் முதல் நண்பரான காபாவுக்கு, முன்னரே சொல்லியிருந்தபடி கம்பெனி வழங்கும் அழகிய பரிசு இந்த ஓவியமே...!

பாதி வரையிறப்போ, கன்னம் கொஞ்சம் அகலமாப் போயி எஸ்ரா மாதிரி ஆயிடுச்சு. அப்புறம் சரி பண்ணினேன்.(பண்ணியிருக்க வேணாம்னு சொல்றீங்களா... அதுவும் சரிதான்...)

வலசையின் முதல் வாசகர்களுள் ஒருவரான காபாவும், வலசையும் மென்மேலும் வளர வாழ்த்துகிறேன்...

ரெஃபரென்ஸ் படத்தில் அவர் முகத்துக்குப் பின்னால் ஒரு சிங்கம் சிலை இருந்தது. வேண்டுமென்றே தவிர்த்துவிட்டேன். காரணம் தெரியும்தானே... ஒரே ஃப்ரேமுக்குள்ள ரெண்டு சிங்................

அப்பார்ட்மெண்டில் ஒரு பெயர் சூட்டுவிழா(only private)

2011-09-10T13:42:00.000+05:30

நதீம் வீடு எங்க?
கேட்டவனுக்குப் பதில்
நான் புதுசுங்க

எதிர்த்த வீட்டில்
ஒரு ஹிந்திக் குடும்பம்
ஒரு சின்னப்பொண்ணு

பக்கத்துல
ஒரு பேச்சுலர்
அடிக்கடி கறி சமைக்கிறான்

இன்னும் ரெண்டு வீடு தள்ளி
எப்பவும் ஒரு நாய் படுத்திருக்கும்
நைட் ரெண்டு மணிக்கு
கதவைப் பிறாண்டுறது
அதுவாக் கூட இருக்கும்

இன்னொரு ஃப்ளோர்
போனதே இல்ல

நதீம் வீடு எங்க?
கேட்டவனுக்குப் பதில்
நான் புதுசுங்க

பதில் எப்பவும் மாறாது

ஆறுமாசங்கழிச்சு...
கண்ணன் மனை இல்லி?
பத்தா நஹி...மே நயா ஆத்மி...

இப்பவும் எதிர்வீட்ல ஒரு
ஹிந்.....

மறதியாய் திறந்து
வைத்த சன்னல்
வழி வந்திருக்கலாம்
இவன்

சிதறிக்கிடந்த
டம்ளர்களை எடுத்து
அடுக்கிய படியே
பெயர் சூட்டித்
திட்டினேன்
தினேஷை...

புது மாப்பிள்ளைக்கு நல்ல யோகமடா...!

2011-08-31T15:37:00.001+05:30

நண்பனும், கொலீக்குமாகிய கார்த்திக்குக்கு நாளை கோவையில் திருமணம்.அதற்காக இருநாட்களுக்கு முன் ஆரம்பித்த தம்பதிகள் உருவப்படம் முழுமையடையவில்லை. வேறு வழியில்லை. முன்னரே மணப்பெண் கேட்டுக் கொண்டதற்கிணங்க, அவனின் உருவப்படம் மட்டும் அவசரத்தில் வரையமுடிந்தது இன்று.
ஊர்ல இருக்கவங்களுக்கெல்லாம் ஜோடி ஃபோட்டோ வரைஞ்சுகொடுத்தா, சீக்கிரம் எனக்கு திருமணமாகும்னு உட்டாலக்கடி சித்தர் சொல்லியதை ஏதோ ஒரு ஓலைச்சீடியில் பார்த்த ஞாபகம்... நல்லதே நடக்கும் :)

இனிய நண்பனுக்கு மணநாள் வாழ்த்துக்கள்...!

இளையராஜாவுடன் எனது ஓய்வுநேரம்-loose water color attempt

2011-08-26T21:08:00.002+05:30

ஒரு பெரிய படம் சமீபத்துலதான் முடிச்சேன். அடுத்த பெரிய படம் ஆரம்பிச்சாச்சு. பென்சில் ஒர்க்குன்னா ரொம்ப அதிக நேரம் எடுக்கும். அதையே பண்ணிக்கொண்டிருந்தால் எப்படி?
பென்சில் ஜாம்மர்ஸில் , வாட்டர்கலரை லூசாகப் பயன்படுத்தி வரையச் சொல்லி பயிற்சி வந்தது. நான்கைந்து நாட்களாக அரித்துக் கொண்டிருந்தது. லேண்ட்ஸ்கேப்பை விட போர்ட்ரெய்ட்தான் ஈசி. அதுவும் பிரபலமான ஒருவர் என்றால் இன்னும் ஆர்வமாக இருக்கும். நம்ம பரிசோதனை முயற்சிகளுக்கு இருக்கவே இருக்கார் இளையராஜா...
வாட்டர்கலர் கண்ட்ரோல் பண்றது கஷ்டம். அதோட ஃப்லோவை கண்ட்ரோல் இல்லாம வரையறதுதான் சோதனை. அது இன்னும் கஷ்டம். ப்ளான்னிங் முக்கியம்.வெள்ளை நிறம் பயன்படுத்தக்கூடாது என்பதால் முதலிலேயே அதற்கான இடம் விட்டுவிட வேண்டும். மனதிற்குள்ளேயே எங்கு டார்க், எங்கு ஒயிட் என முடிவுசெய்துவிட்டு, முடிந்தால் பென்சிலில் சிறு மார்க்குகள் இட்டுவிடவேண்டும்.
பென்சில் ஒர்க்+ திட்டமிடல் அரைமணி நேரம் ஆனது.
அதன்பின் பெயிண்டிங் 20 நிமிடங்களுக்குள் முடிந்துவிட்டது. இந்த முறையில் உருவப்படம் வரைய வேண்டுமென்பது நெடுநாள் ஆசை.
அவ்வளவு திருப்தி தரவில்லை எனினும் முயற்சி ஓகேதான்...
பார்த்தமைக்கும், ரசித்தமைக்கும் நன்றிகள்...

இன்னும் ஒருவருக்கு நன்றி சொல்லவேண்டும். அது ரவிஷங்கர் சார்தான். அவரின் சமீபத்திய பதிவான ‘இளையராஜாவின் ட்ரம்பெட்’ பதிவின் பாடல்கள் பின்புலமாக ஒலிக்க உருவான ஓவியம் இது...
நன்றி சார்...!நன்றி இளையராஜா சார்!

’வலசை’யில் எனது ஓவியம்

2011-08-25T19:53:00.000+05:30

புதிய தமிழ் இலக்கியச் சிற்றிதழான ‘வலசை’யில் வெளிவந்த எனது ஓவியம் இது. ஜோஸ் சரமோகாவின் ‘Blindness' நாவல் அறிமுகத்துக்காக, நண்பர் வி.பாலகுமார் மொழிபெயர்த்திருந்த பகுதியில் வந்திருக்கிறது.
வாய்ப்பளித்த நேமிக்கும், காபாவுக்கும் நன்றிகள்...!
இப்போதுதான் படிக்க ஆரம்பித்துள்ளேன். விரைவில் படித்துமுடித்துவிட்டு எழுதுகிறேன். நன்றி....!

முதல்தடவையாக அச்சு ஊடகத்தில் எனது ஓவியம் வந்ததில் மகிழ்ச்சியைப் பகிர்ந்து கொள்கிறேன்...!

வட இந்தியத் தம்பதிகள்-உருவப்படம்

2011-08-24T20:13:00.000+05:30

வெகுநாட்களாகக் கேட்டுக்கொண்டிருந்த நண்பனுக்காக...
இந்தோரில் ஹிந்துஸ்தான் மோட்டார்ஸில் வேலை பார்த்துக் கொண்டிருந்தபோது என்னுடன் வேலை பார்த்தவன். இருவரும் ஒரே பாஸின் கீழ் வேலை பார்த்தோம். இவன் அங்கு சீனியர் என்பதால் ஸ்டேண்டர்ட்ஸ், வழிமுறைகள் இன்னும் பல உதவிகள் செய்தவன்.இப்படம் அவனுக்குத் திருப்தி தந்ததா தெரியவில்லை...:(
இப்படம் கொஞ்சம் பெரிய அளவில் செய்தது. A2 size (59x42 cm).. my favorite 8B steadler pencil....
என் ஸ்கேனரில் ஸ்கேன் செய்ய இயலாததால், என் மொபைல் கேமராவில் படமெடுத்துப் போட்டுள்ளேன். மிகக் கஷ்டப்பட்டு செய்த உடைகள், முடி இன்னும்பல நுணுக்கமான டீட்டெய்லிங் வேலைகளை இதில் உங்களால் பார்க்கமுடியாது என்பது என் வருத்தம். :(
இருந்தும் உங்கள் பார்வைக்கு.... பார்வைக்கும், ரசிப்புக்கும் நன்றிகள்...!

வாருங்கள் வரையலாம்...ஓவிய ஆர்வம் உள்ளவர்களுக்கு....

2011-08-23T22:40:00.002+05:30

ஆ...ஊன்னா கூட்டம் கூட்டமாக் கெளம்பிடுறானுங்கய்யா... ஞாயிற்றுக்கிழமை வந்துட்டா முதல் வேலை வெளிய கிளம்புறதுதான். என்ன மாதிரி ஒரு சோம்பேறியைப் பார்க்கவே முடியாது.ஷாப்பிங் பிடிக்காது, ஊர் சுத்தப் பிடிக்காது, கோயிலுக்குப் போகப் பிடிக்காது, கூட்டமா இருக்கதால பண்டிகை நாட்கள்ல ஊருக்குப் போகக் கூடப் பிடிக்காது. ஆனாலும் என்ன பெரிய வேலை இருந்தாலும், எனது ஞாயிறுகள் பெங்களூரை எக்ஸ்புளோர் பண்ணக் கிளம்பிவிடுகின்றன. ஒரே காரணம் பென்சில்ஜாம் மீட்டிங்க்தான்.பெங்களூரில் இருக்கும் ஒவ்வொருவிதமான ஆர்டிஸ்டுகளும், (என்னை மாதிரி ஜூனியர் ஆர்டிஸ்டுகளும்தாங்க), பார்க்லயோ, ஏரியிலயோ, மியூசியத்துலயோ, காலைல 9 மணிக்குக் கூட ஆரம்பிச்சிடுவோம்...(நான் எப்பவும் 11 மணிக்குத்தான் போவேன் :) ). யாரும் யாருக்காகவும் காத்திருப்பதில்லை. வந்தவுடன் பேப்பரோ, ஸ்கெட்ச் புக்கோ எடுத்து அவரவர் வேலையை ஆரம்பித்துவிடுவர். நான் நான்கு மாதங்களாகத்தான் ரெகுலராகச் சென்று வருகிறேன். ஒவ்வொருத்தரோட எக்ஸ்பீரியன்ஸ், அவங்க ஸ்டைல் எல்லாம் பகிர்ந்துக்குவாங்க. அரட்டை, காஃபி, சிகரெட் எல்லாம் உண்டு. நல்ல டிப்ஸ் கிடைக்கும்.
பென்சில் ஜாம்மர்ஸோட மெயின் எய்ம், மரபு சார்ந்த ஓவிய வகைகள்தான். இதனை ஒழுங்காகப் பயிற்சியெடுத்தால், அப்ஸ்ட்ராக்ட் வகைகள் எளிதில் கைகூடும் என்பதும், எளிதாக இருக்கிறது என முதலிலேயே அப்ஸ்ட்ராக்ட் வகைகள் செய்வது சரியல்ல என்பதுவும் எண்ணங்கள்....
இங்க வரைய பெரிய ஆர்டிஸ்டாக இருக்கணும்னு அவசியமில்லை. பென்சிலும், பேப்பரும் இருந்தால்கூடப் போதும்....
இன்னொரு விஷயம், இங்கு ஆயில், அக்ரிலிக் வகையறாக்கள் அதிகம் விரும்பப் படுவதில்லை. அது எளிது என்பது எண்ணம். இருப்பதிலேயே, சவாலானதாகக் கருதப்படும் வாட்டர்கலர்தான் இங்கு எப்போதும் லைம்லைட். 8 மணி நேரம் உக்கார்ந்து உக்கார்ந்து டீட்டெயில்டா பென்சில் ஸ்கெட்ச் பண்ணாக்கூட , ‘just like that' நு போய்ட்டே இருப்பாங்க.... அரைமணி நேரத்துல அழகா water washes பண்ணியிருந்தா உச்சி மோந்துடுவாங்க....
பெங்களூர்ல ஆரம்பிச்ச இந்த க்ளப், டெல்லியிலயும் இருக்கு. புனே, ஹைதராபாத்ல அப்பப்போ நடக்கும். போன வாரம் சென்னைல கூட ஒரு பொண்ணு இனிஷியேட் பண்ணிருக்கு. ஆனா யாரும் போகலைன்னு நினைக்கிறேன். இதைப் படிக்கிற சென்னை மக்கள்ஸ் அவங்களோ, இல்லை அவங்க நண்பர்களுக்கோ இதைப் பரிந்துரை செய்யுங்கள் அவர்களும் வளரட்டும், பென்சில் ஜாம்மர்ஸூம் வளரட்டும்....

நான் 6 மாசத்துக்கு முன்னாடி எப்பவோ வலையேத்துன படங்களையும், இப்ப சுடச்சுட போடுற படங்களையும் பார்த்தா, என் விரலின் நீட்டம் புரியும் :)

இது ஒரு விளம்பரப் பதிவல்ல. ஒரு பகிர்வு... பகிரவேண்டும் எனத்தோன்றினால் நீங்களும் ரீஷேர் செய்யுங்கள்...
குறிப்பு: பென்சில் ஜாம்மர்ஸில் இணையக் கட்டணம் இல்லை. இது ஒரு ஓவியத் தன்னார்வு வளர்ப்பு மையம்...
வாருங்கள் வரையலாம்.....

www.penciljammers.com

நீஈஈஈஈண்ட நாள் வேலையிலிருக்கும் படம்...

2011-08-20T22:33:00.002+05:30

இரண்டு மூன்று மாதங்களுக்கு முன்பு பெரிய ட்ராயிங் போர்ட் வாங்கிய பிறகு ஆரம்பித்த படம்.90 சதம் முடித்தபின் தெரிந்தது...உடலுக்கும், கால்களுக்கும் விகித அளவு சரியில்லையென. பிறகு கால்களை வெட்டி, மறுபடியும் ஒட்ட ஆரம்பித்தேன். வீடு மாற்றும் போது போர்டிலிருந்து, உடைந்த கால்களிலேயே தாவி ஃபைலுக்குள் ஓய்வெடுக்க ஆரம்பித்துவிட்டது. இப்போதிருக்கும் கமிட்மெண்ட்டுகளில்(நண்பர்களுக்கானது) இன்னும் இரண்டு மாதங்களுக்கு இதை எடுக்க முடியாது. அதனால் முடிவுறாத நிலையிலேயே போஸ்ட் செய்கிறேன்...ரொம்ப விரும்பி ஆரம்பிச்சுச் செய்த படம்...:(

ரெஃபரென்ஸ் படம்: உறுபசி நாவலின் அட்டை...

8B and 6B in cartridge

கண்களால் பொறுக்கியவை-ஊருக்குப் போனதும் வந்ததும்

2011-08-18T22:15:00.000+05:30

முதல்நாள் மழை கெடுத்ததால், ரத்தான பயணம், வெள்ளியன்று 12.08.11 தொடங்கியது...ஒயிட்ஃபீல்டு டூ சாந்திநகர்(ஆட்டோ),பெங்களூர்-சேலம், சேலம்-கரூர்,கரூர்-திண்டுக்கல், திண்டுக்கல்-தேனி...
பெண்டை நிமிர்த்திவிட்டது பயணம்.
போரடிக்காமல் இருந்ததற்குக் காரணம் கீழ்க்காணும் ஸ்கெட்சஸ்..
ரிடர்ன் ஜர்னி 15.08.11 இரவு திண்டுக்கல் டூ பெங்களூர் ட்ரைன்...பகல்லயே எனக்குப் பசுமாடு தெரியாது, இருட்டுல எருமை மாடா தெரியும்... அதான் ஃபுல் டீட்டெயில்டா வரையமுடியலை ரயில்வே ஸ்டேஷனை...
எல்லா குவிக் ஸ்கெட்சஸ் பயணத்தின் போதும், காத்திருப்பின் போதும் போட்டது. கமெண்டுகள் இப்போதுதான் போட்டேன்...
பார்த்தமைக்கும், ரசித்தமைக்கும் நன்றிகள்...

எங்கவீட்டுக் குட்டி சீரிஸ்- வாட்டர்கலர் போர்ட்ரெய்ட்

2011-08-16T08:13:00.000+05:30

ஃபோட்டோன்னா இப்டியா மிரளும் குழந்தை??!!

2011-08-08T02:27:00.000+05:30

ட்விட்டர் நண்பர் @பிளிறல் என்னும் பாலாவின் ஃபேஸ்புக்கில் இப்படத்தைப் பார்த்ததிலிருந்து ஒரு அரிப்பு.இதனை ஸ்கெட்ச் செய்துவிட வேண்டுமென,
போனவாரம், அவர் வீட்டுக்கு அவரையும், அவர் மகள் யாழினியையும் பார்க்கலாமென, நானும், அண்ணன் TBCD உம் திட்டமிட்டோம். ஞாயிறு சந்திப்பு என முடிவானது. வெள்ளியன்று திடீரெனத் தோன்றிய யோசனை, ஏன் அவரும், அவர் மகளும் இருக்கும் ஃபோட்டாவை வரைந்து ஃப்ரேம் பண்ணித் தரலாமேவெனெ. போன வெள்ளி இரவு, சனி இரவு எவ்வளவு முயன்றும் முடிக்கமுடியவில்லை. வெறுங்கையோடு போய் விருந்து சாப்பிட்டு விட்டு வந்தேன். ஒருவாரம் கழித்து இன்று இரண்டு மணிநேரம் செலவழித்து படத்தை ஓரளவுக்கு பூர்த்தி செய்தபின்தான் சாப்பிட்டதே செரித்தது எனலாம்.
பாலா இதில் கொஞ்சம் ஒல்லியாக வரைந்துவிட்டேன்.:) ஆனால் நான் முக்கியமாக நினைத்தது, இருவரின் எக்ஸ்பிரஸன்ஸ்தான்...பாலாவின் ஃபோட்டோவுக்கான சிரிப்பும், கேமராவைப் பார்த்து ‘என்னவோ ‘ எனச் சற்றே மிரளும் யாழினியின் எக்ஸ்பிரஸனும்தான்... அதை முக்கியமாகப் பதிவாக்க நினைத்தேன். பரவாயில்லை. ஓரளவுக்குக் கொண்டுவந்துவிட்டேன் என நினைக்கிறேன்....
இப்படத்தில் எனது சிரமங்கள்....முதலாவது ஒரே போர்ட்ரெய்ட்டில் இரண்டு முகங்கள்... இரண்டாவது வழக்கமாக வரைவதைவிடப் பெரியசைஸ் A2 size( 59x42 cm) ...easel இல் வைத்து வரைகையில், கை, தோள் வலி பின்னிவிட்டது.
பென்சிலும் கரைந்துவிட்டது... முடிவில் பார்க்கையில் ஒரு சிறு திருப்தி...
பார்வைக்கும், ரசிப்புக்கும் நன்றி...
பெரிய சைஸ் என்பதால், ஸ்கேன் செய்ய முடியவில்லை. என் மொபைல்கேமராவில் படமெடுத்துப் போட்டிருக்கிறேன்.மன்னிக்கவும்....

8b and EE steadler pencil....

அல்சூர் ஏரி-07-08-11-பெங்களூர்

2011-08-07T21:58:00.000+05:30

என்ன க்ளைமேட்யா இன்னைக்கு...! காலையில வண்டில போறப்பவே தூக்கம் சொக்குது. அதைக் கட்டுப்படுத்திட்டு அல்சூர் லேக் போனேன்.அந்த ஏரி பேரும் அல்சூர் லேக்.ஏரியா பேரும் அல்சூர் லேக்.இன்னைக்கு பென்சில் ஜாம் ஏரியைச் சுற்றியிருக்கும் பூங்காவில்தான். அங்க போகலாம்னு ஆட்டோ ஓட்டுநர்களிடம் விசாரித்தேன், ‘அல்சூர் லேக் எங்க இருக்கு?’, “இதான் சார்”..’இல்லங்க..அல்சூர் லேக்கேதான் போகணும்’... கொஞ்சம் முறைத்தபடி,’இதான்’ என்றவரிடம்....கொஞ்சம் கெஞ்சும் தோரணையில், ‘மே லேக் அந்தர் சே ஜானா ச்சாஹியே’ன்னு குச் குச் இந்தி மே போல்தியா...கை, காலெல்லாம் ஆட்டி வேறு காண்பித்ததில், ஒரு வழிகாட்டினார்... நன்றி...

ஒரு வழியாக உள்ளே சென்றால் ஏகப்பட்ட அதிர்ச்சிகள்... பார்க்கிங் ஃபீஸ் இல்லை.இது இன்ப அதிர்ச்சி. நுழைவுக் கட்டணம் இல்லை.இரண்டாவது இன்ப அதிர்ச்சி.அவ்வளவே...அடுத்து எல்லாம் துன்ப அதிர்ச்சிகள்தான்...
காலையிலேயே அப்படியொரு குளிர்காற்று.20 கிமீ வண்டியில் போனது எல்லாம் சேர்ந்து கொண்டு,இயற்கை உபாதை நம்பர் ஒன்றைத் தூண்டிவிட்டது. சரி போகலாம்னு கழிவறை தேடினால், பூட்டி வச்சிருக்கானுங்க...அப்புறம் வெளிய வந்து எதிர்த்தாற்போல ‘ரெட்கிராஸ்’ மருத்துவமனை சென்று கழித்துவிட்டு வந்தேன்.அதை முடிச்சாத்தான,அடுத்தடுத்த வேலைகளை ஃப்ரீயா பார்க்கலாம்...:)

எவ்வாரமும் இல்லாத அளவு இன்று அதிகமான பென்சில்ஜாம்மர்ஸ்.நிறைய புதியவர்கள்.அறிமுகம் செய்துகொள்வதற்கே அரைமணிநேரமாயிற்று. அதுக்கப்புறம் எல்லார் பேரும் மறந்துடுச்சு(பொண்ணுங்க பேர்கூட மறந்துடுச்சுன்னா பாருங்களேன்...) அடிக்கடி பென்சில், பால்பாயிண்ட் பென் மட்டும் ஸ்கெட்ச் செய்வதால் இம்முறை வாட்டர்கலரைக் கையாள முடிவு செய்தேன்...
கம்ஃபர்டபிள் ஜோன்ல சுகமா இருக்கிறதைவிட, அன்கம்பர்டபிள் ஜோன்ல இஷ்டப்பட்டு கஷ்டப்படலாம்னு ஒரு மகான்(நான் தான்) சொன்னதை மனசுல வச்சுக்கிட்டு வரைய ஆரம்பிச்சேன்.
பத்து நிமிசத்துக்கொரு தரம் வானிலை மாறுது. நான் பார்க்கும் மரங்கள், அடிக்கடி அனைத்துப் பச்சைகளையும் காட்டிக் கண்ணாமூச்சி ஆடிக்கொண்டிருந்தது.
புதுசா ஒரு பிரஷ் நேத்துத்தான் வாங்கினேன். இம்போர்ட்டட் பிரஷ்( இந்திய பிரஷ்கள், உயிரினங்களின் முடி கொண்டு தயாரிக்கப்படாமல், சிந்தெடிக் இழையால் தயாரிக்கப்படுவதால், அவற்றின் தரம், ரிலையபிளிட்டி குறைவு. இம்போர்ட்டட் பிரஷ் என்பதால், அவற்றின் நீர் கொள்ளும் அளவும், நிறமிகள் பிடிக்கும் தன்மையும் அதிகம்).ஒரு பிரஷ் விலை மட்டும் ரூ 500 ஒன்லி...

இந்த ஒரு பிரஷை வச்சே கீழே இருக்க முழுப்படமும் 95 சதம் முடித்தேன். பெரிய ’ஏரி’யா முதற்கொண்டு, சிறிய இடம் வரை இதை அழகாக உபயோகப்படுத்தலாம். இன்றைய படம் ஒரு பயிற்சி மாதிரிதான்.பிரஷைக் கையாள்வதற்கு அட்டகாசமாக இருந்தது. படம் வரைய ரொம்ப ‘தின்’ நா இருக்க ஹேண்ட்மேட் ஷீட் எடுத்தது என் தவறு. இல்லையேல் நன்றாக வந்திருக்கும். அடிக்கிற காத்தில், அம்மி முதல் ஆண்டி வரை பறக்கையில் நான் வைத்திருக்கும் ஷீட் எம்மாத்திரம். க்ளிப்பும் எடுத்துப்போகவில்லை. இதைச் சமாளிப்பதற்கே நேரம் சரியாகிவிட்டது.

தண்ணீர் ஊற்றிவைக்க சின்ன டப்பா எடுத்துப்போகவில்லை. அங்கு இருக்கும் கேண்டீனில் ஒரு பிளாஸ்டிக் கப் கொடுப்பான்னா, அது மட்டும் முடியாது. எண்ணிக்கை இருக்குதுங்கிறான். சரி ஒரு காஃபி வாங்கிட்டு, அதைக் கழுவி அப்புறம் அதை உபயோகித்தேன்.

முடிவு திருப்தி தராவிட்டாலும், முயற்சியளவில் திருப்தியளித்த படம்...
ஊர் சுற்றிவிட்டு, மழையின் முதல்துளியுடன் வீடு வந்து சேர்ந்தேன்.பார்வைக்கும், ரசிப்புக்கும் நன்றிகள்....

நண்பேன்டா....ரசிகேன்டா...

2011-08-05T04:05:00.001+05:30

கடந்த ஒரு வருடமாக என்னுடன் அலுவலகத்தில் குப்பை கொட்டிக் கொண்டிருப்பவன் என் நண்பன் சுரேஷ்...(என் மொக்கைகளைச் சகித்துக் கொண்டிருப்பவன்) எனது ஓவியங்களுக்கு நல்ல ரசிகன். மிகச் சரியாக கிரிட்டிசைஸ் பண்ணுவான். தேவைப்படும் நேரங்களில் என்கரேஜூம் செய்வான்.சமீப காலமாக ‘நீ கலைஞன்டா’ எனப் பாராட்டுகிறான்(இல்லை கலாய்க்கிறான்)....

நீண்ட நாட்களாக அவனது உருவப்படம் வரைந்துதரச்சொல்லியிருந்தான். இரு நாட்களுக்கு முன் வீட்டில் சிறுவிருந்து வைத்தேன். விருந்தின் முடிவில் அவனை அமரவைத்து, லைவ்வாக பேசிக் ஸ்கெட்ச் செய்தேன் ஐந்து நிமிடத்தில். பின் இன்று ஃபோட்டோவை வைத்துப் படத்தை மெருகேற்றினேன். 8B and EE steadler pencils in cartridge paper. சற்றுப் பெரிய படம்தான்...திருப்தி யில்லை. அடுத்த முறை இன்னும் சிறப்பாகச் செய்துவிடலாம்...
இன்னொரு பெரிய போர்ட்ரெய்ட் 80 சதம் முடிந்து பெண்டிங்கில் ஒருவாரமாகக் கிடக்கிறது. இந்த வீகெண்டில் முடிக்க வேண்டும்...

size : A2(59 x 42 cm)

கறுப்புவெள்ளை குடும்பச் சித்திரங்கள்-சிறப்புவாய்ந்தவை-பென்சில் ஓவியங்கள்

2011-07-22T00:06:00.000+05:30

ஒவ்வொரு முறை ஊருக்குப் போகும் போதும் நினைத்துக் கொள்வேன், அம்மாவைப் படம் வரைய வேண்டுமென்று. இந்தமுறை நல்ல வாய்ப்பு கிட்டியது.
அம்மா மட்டுமல்ல, அத்தை, அப்பா, சகோதரர் மகன் என அனைவரையும் லைவ் ஸ்கெட்ச் செய்துவிட்டேன். லைக்னெஸ்ஸூம் நன்றாக வந்திருந்தது.
அனைவரையும் டிவி பார்க்கச் சொல்லிவிட்டு வரைந்தேன். ஃபைனல் டச் இன்றுதான் கொடுக்க முடிந்தது...
அம்மா

இது அப்பா...

இது அத்தை...

இது சகோதரரின் மகன்...

போஸ் கொடுக்கவைப்பதற்குள் பட்ட பாடு அப்பப்பப்பா...தூங்கிக் கொண்டிருந்தவனை எழுப்பி, அவன் முழிக்கும் சமயங்களில் மட்டும், விழிகளை வரைந்துவிட்டேன். அதன்பின் மற்ற பாகங்களை வரைந்தேன்.செம க்யூட் அண்ட் நாட்டி பாய்.... மேலேயுள்ள அத்தையை வரையும் போது அவன் சொன்னது, ‘அப்பா, ஆச்சி(அவனுக்கு ஆச்சி) கன்னத்துல இருக்க புண்ணையும் வரையுங்க.” (தழும்பைச் சொல்கிறான்). மேலும் அனைவரையும் நான் டிவி பார்க்கச் சொன்னதால், அவர்கள் சற்று அசைந்தால் கூட, ‘ஆச்சி, அப்பாயி’ டிவி பாருங்க. அப்பா வரையுறாருல்ல’ என அதட்டினான்...:)

இதுவும் அவனது படம்தான். முடிக்கவில்லை. போஸை மாற்றிவிட்டான்...:(

பார்வையிட்டமைக்கு நன்றி...!

எல்லாப் படங்களும் வரைந்தது க்ரேட் 8B Steadler பென்சிலில் கார்ட்ரிட்ஜ் பேப்பரில்.ஒவ்வொரு படமும், லைவ்வாக 20 நிமிடமும், ஃபினிஷிங் டச்சுக்கு (ஆஃப்லைன்) 15 நிமிடமும் எடுத்துக் கொண்டது. தோராயமாக...

கெம்பேகவுடா அருங்காட்சியகம்-100711

2011-07-11T00:35:00.000+05:30

இந்த வார இறுதி ஊருக்குச் செல்வதாகத் திட்டமிட்டு , கடைசி நேரத்தில் ரத்தாகிவிட்டது. அதனால் இம்முறை தொடர்ந்து நான்காவது வாரம் பென்சில் ஜாம்மர்ஸ் ,மீட் அட்டெண்ட் பண்ணிவிட்டேன்(கடும் சோம்பலையும் மீறி). MG சாலையில் இருக்கும், கேட்பாரற்ற ஒரு கட்டிடம் இந்த கெம்ப கவுடா அருங்காட்சியகம். அங்கு என்ன இருக்குமென்று கூடத் தெரியாது. இன்று போய்ப் பார்த்தால், ‘ஞாயிறு விடுமுறை’யாம். நேற்று இரண்டாவது சனிக்கிழமை விடுமுறையாம். உலகத்துலயே வார இறுதிகள்ல கதவடைக்கிற மியூசியம் வச்சிருக்க கோஷ்டி நம்ம கோஷ்டிதான்.

அதனாலென்ன போச்சு நமக்கு. எனது தேவை கட்டிடம்தான்...இது மற்றும் இதற்கு அருகிலுள்ள இன்னொரு கட்டிடத்திலும் சேம் பேட்டர்ன் ஸ்ட்ரக்சர் தான்...
கதவு , சன்னல் வேலைப்பாடுகளைப் பிரதியெடுப்பதற்குள் தாவு தீர்ந்துவிட்டது.
அதுவுமில்லாமல் இன்று நிறைய ஜாம்மர்ஸ் வந்திருந்ததால், சாக்லேட், மிக்சர், பேச்சு, கடலை என நிறைய நேரம் வீணாகிவிட்டது.
முதலிலிருக்கும் படம் அங்கு லைவ்வாக நின்று செய்தது.

பின் மொபைலில் படமெடுத்துக் கொண்டு வீட்டில் வந்து தொடர்ந்தேன்...பால்பாயிண்ட் பென்,பிக்மெண்ட் லைனர் 0.8(நம்மூர் மைக்ரோடிப் பேனா மாதிரி இது ஜெர்மன் மேக்) இன் A5 size sketch book....

ப்ளாக்கர் டீபால்டா தர்ற பிக்னிக் பிக்சர் எடிட்டர்ல பார்டர் போட்டேன். ஐ... ! நல்லா இருக்கே....:))

குறிப்பு: அவ்ளோ திருப்தியாயில்லை. போனதுக்கு ஆத்தின கடமை இது...

நான் இப்டில்லாம் சிரிச்சதில்லை:)

2011-07-10T02:18:00.001+05:30

பென்சில் ஜாம்மர்ஸில் 'Nose crunching' expression க்காக படங்கள் வரைஞ்சிருந்தாங்க இரண்டு மூன்று பேர்.அதற்கு வரைய நினைத்தேன். அதே நேரம், தற்செயலாக ஃபேஸ்புக்கில் நண்பர் பிரவீன்குமார் ஃபோட்டோ ஆல்பங்களும் பார்த்தேன். அதில் இப்படிச் சிரித்துக் கொண்டிருந்தாள் ஒரு குட்டி.http://www.facebook.com/photo.php?fbid=471735208851&set=a.471733383851.262494.779813851&type=1
அதையே ரெஃபரென்ஸாக எடுத்து வரைந்தேன். 6B,8B & EE pencils in cartridge paper.
கொஞ்சம் ரெஸ்ட்லஸ்ஸாகவே ஆரம்பித்தேன். பரவாயில்லை...

இன்னொரு முயற்சி அவ்வளவே...கோடுகளில் பாவனா...

2011-07-08T01:19:00.001+05:30

பென்சில் ஜாம்மர்ஸோட ‘கண்’ மட்டும் வரையும் எக்ஸர்ஸைஸூக்காகத் தேடிய படம் பாவனாவினுடையது. பார்த்தவுடன், முகம் முழுவதும் வரைய முடிவெடுத்தேன். பால்பாயிண்ட் பென்னில் வரைந்தது. அது ஒரு த்ரில். எவ்வளவுதான் கவனமாக வரைந்தாலும், ஏதாவது ஒரு இடத்தில் இங்க் கொட்டிவிடக்கூடிய அபாயமுண்டு.(படத்தைப் பார்த்தால் தெரியும்.இரு முக்கிய இடங்களில் இங்க் கொட்டிவிட்டது. மூக்கின் ஓரம், கன்னத்தில்:( ) நல்ல விஷயம் என்னன்னா, அழிக்க ரப்பர், அதைத் திரும்ப வரையுற நேரம் இதெல்லாம் தேவைப்படாது. கவனக்குவிப்பு அதிகமாகிவிடும் தியானம் போல்....

ஒர்க் இன் ப்ராஸஸில் நன்றாக இருந்தது போலிருந்தது.
தொடர் ப்ராஸஸில் எங்கோ சொதப்பிவிட்டது. விடமாட்டேன் பாவனாவை...
உங்கள் பார்வைக்கு....

கழுவி ஊற்றியது...

2011-07-05T00:36:00.000+05:30

இரு தினங்களுக்கு முன் ஒரு பூ படம் வாட்டர்கலரில் முயற்சித்தேன்.அழகான ரோஸ் நிறத்தில் பச்சைப் பின்னணியில், முக்கால்வாசி வந்தபின் தெரிந்தது, சரியில்லையென. வாட்டர்கலர் பேப்பரில் செய்தது(20 x 15cm). ஒரு பேப்பரே 10 ரூபாய் வரும். வண்ணங்கள் நிறைத்திருந்த பேலட்டைப் பார்த்தேன். பயன்படுத்திய ரோஸ் நிறம் போக, இரு பச்சை நிறமும், பிரவுன், புளூ நிறமும் மிச்சமிருந்தது. பேப்பரையும், பேலட் வண்ணங்களையும் வீணாக்க வேண்டாமென அதன் பின்புறம் இன்னொரு படம் வரைய முடிவெடுத்தேன். கூகிள் இமேஜஸில் ‘Green' எனத் தேடியதில் வந்து விழுந்த படங்களில் இதுவும் ஒன்று. இதில் வெளிச்சம் வரும் வழி பிடித்திருந்தது. ரொம்ப ஃப்ரீயாக வரைய ஆரம்பித்தேன். wet in wet முறையில் ஆரம்பித்து,(ஒரு வண்ணத்தை மிக நீர்மமாக அடித்துவிட்டு அது காய்வதற்குள் அடுத்த வண்ணத்தை அதில் சேர்ப்பது). பின் காயவிட்டு அடுத்த, அதற்கடுத்த லேயர்கள் எனச் செய்தேன்.இதுபோல் முயற்சிப்பது முதல்தடவை. பரவாயில்லை.

20x15cm, green, watercolor, watercolorpaper

நான் என்பது நீயல்லவோ....

2011-07-03T01:24:00.000+05:30

     பென்சில் ஸ்கெட்ச்சிங்கில் ஓவராக ஷேட் கொடுத்துப் பழகிவிட்டது. பால்பாயிண்ட் பென்னில் போர்ட்ரெய்ட் வரையும் போது அதுபோலவே லைட்டாக ஷேட் கொடுத்து, டார்க்காக்குவது தொடர்கிறது. சமீபத்தில் அதைக் கொஞ்சம் கொஞ்சமாக மாற்றிக் கொண்டு வருகிறேன். கட்டிடங்கள் வரைகையில் கோடுகளுக்கும், க்ராஸ் ஹேட்சிங் லைன்களுக்கும் முக்கியத்துவம் கொடுத்துப் பழகிவருகிறேன். அதே பாணியில் இந்தப் படத்தையும் செய்துபார்த்தேன். மறுபடியும் உன் மூஞ்சிதானான்னு திட்டுறது தெரியுது. நட்பு ரீதியில் வரையச் சொன்ன நண்பர்களின் முகங்களை விட்டுவிட்டு இதை வரைந்திருக்கிறேன், ’கிடக்கிறதெல்லாம் கிடக்கட்டும், கிழவியைத் தூக்கி மனைல வய்யி’ன்ற கதையான்னு நினைக்கலாம்....
என்னங்க பண்றது. அதெல்லாம் நல்லா பெர்ஃபெக்டா வரையணும்னு நினைச்சே தள்ளிப் போயிடுது.இந்த மாசத்துக்குள்ள ரெண்டு கமிட்மெண்ட் முடிச்சே ஆகணும்னு நினைச்சிருக்கேன். அதுல ஒண்ணு தம்பதிகள்.(ஓப்பன்ஸ்டேட்மெண்ட் விட்டா, பண்ணிடலாம்னு எண்ணம்தான்) :)

         சுத்தமாக வரையவே மூடு இல்லாத சமயத்தில், இதை வரைய ஆரம்பித்தேன். பென்சில் ஜாம்மர் நண்பர் முரளியின் புகைப்படக் கைவண்ணம்தான் என்னை வரையத் தூண்டியது.

      இன்னுமொரு சிறப்பு... இது நான் புதிதாக வாங்கிய CANON PIXMA MP258 ஆல் இன் ஒன் (ப்ரிண்ட், ஸ்கேன், காப்பியர்) மூலம் ஸ்கேன் செய்து தரமாகத் தரவேற்றப் பட்டது என்பதையும் தெரிவித்துக் கொள்ள விழைகிறேன்....:)

   ஸ்கேன்னர் வாங்க நெட்டில் தேடிப்பார்த்தால் உருப்படியான விலைவிபரம் கிடைக்கவில்லை. டோல் ஃப்ரீ நம்பர் ஃபோன் செய்து பார்த்தாலும் தேறவில்லை.எனக்கு ஸ்கேன்னர், ப்ரிண்டர் ஸ்பெசிஃபிகேஷன் பத்தி எதுவும் தெரியாது. என் பாஸிடம் கேட்டேன்.(அவர் ஆஃபீஸில் டெக்னிக்கல் விஷயங்களைவிட வீட்டு விஷயம், ஷாப்பிங்விடயங்களை அதிகம் பேசுவதில் ஆர்வமுள்ளவர் :) ). அவரி ஆலோசனை ‘நேரா SP road (நம்மூர் ரிச்சி ஸ்ட்ரீட் மாதிரி). அங்க போய் மூணு நாலு கடைல விலை விசாரி. கம்மியாச் சொல்ற இடத்துல வாங்கிடு”. இதையே பாலமந்திரமா எடுத்துட்டு, நேரா எஸ்பி ரோட் போனேன். ஒரு சைடுதான் பார்க்கிங் போல. நுழைஞ்ச உடன் ஒரு ஹெச் பி ப்ராடக்ட் கடை இருந்தது. வண்டியை ஆப்போசிட் சைட்ல பார்க் பண்ணிட்டு விலை விசாரிச்சேன். HP 1050 விலை 3150+ டாக்ஸ் நு சொன்னான். சரி இன்னும் அடுத்த கடைகள் கேட்கலாம்னு போனேன். ஏறக்குறைய எல்லாக் கடையிலயும் அதே ரேட்டுதான் சொன்னாங்க.(50 ரூபாய் கூடக் குறைய). சரி இங்க எங்க விசாரிச்சு வாங்கினாலும் 100 200 தான் சேமிக்கமுடியும். இதுக்கு முதக் கேட்ட கடையிலயே போய் வாங்கலாம்னு போனா, வண்டியைக் காணோம்.5 செக்கண்டுக்குள்ள மனசுக்குள்ள இருந்த ‘பொல்லாதவன்’ தனுஷ் வெளிய வர ஆரம்பிச்சான். ஏன்னா இந்த வண்டி(பேஸ்ஸன் ப்ரோ) வாங்கினதுக்கப்புறம்தான் என்கிட்ட சில விஷயங்கள் வந்து சேர்ந்தது(டேங்க் பேக், சீட் கவர், இண்டிகேட்டர் பஸ்ஸர் இப்டின்னு லிஸ்டு போகும்). நான் ரொம்பக் கொடூரமா மாறுறதுக்குள்ள பக்கத்துல இருந்தவர், ‘உன் வண்டி அந்தா போகுது’ன்னு சொன்னாரு... போய்ப் பார்த்தா, Recovery van ல என் வண்டியும் பல்லக்குல ஏறின மாதிரி நின்னுக்கிட்டு இருந்துச்சு. அந்த வேன்ல இருந்த ஒருத்தன்கிட்ட பேசிப்பார்த்து 500 ரூபாயை, 250 ஆக் குறைச்சு டீலை முடிச்சிட்டு வண்டியை எடுத்துட்டு வந்தேன்.(பார்க்கிங்க்ல தரையில நிக்கிற வண்டியை எடுக்கவே எனக்கு 5 நிமிஷம் ஆகும். பாவிங்க இவிங்க அசால்ட்ட 5 செக்கண்ட்ல வண்டியை வேன்ல இருந்து இறக்கிக் கொடுத்துட்டாய்ங்க.க்ராதகர்கள்)

         திரும்ப அந்தக் கடைக்குப் போக முடியாது. ஏன்னா ஒன் வே. ஒரு நாளைக்கு ஒரு தடவைக்கு மேல அநாவசியச் செலவு பண்ணக்கூடாதுன்றது என் கொள்கை(தினம் அதை மீறிடுவேன்றது அடுத்த கொள்கை) பக்கத்துல இருந்த இன்னொரு கடையில விசாரிச்சு கிட்டத்தட்ட இதே ரேட்டுக்கு கேனான் வாங்கினேன். கடைல இருந்த பையன்கிட்ட இதை வண்டில கட்ட ஹெல்ப் பண்ணுடான்னு கேட்டேன். அவன் எடுத்துட்டு வந்தான் பாருங்க கயிறு, சின்னப்பையங்க கட்டுற அண்ணாக் கயிறு மாதிரி, அதில கட்டினான், வண்டியை ஸ்டேண்ட் விட்டு எடுக்கிறப்பவே, கேனான் சரிய ஆரம்பிச்சது. மனசுக்குள்ளயே திட்டுட்டு அதைக் கழட்டிட்டேன். நான் ஏற்கெனவே கிளம்புறப்பவே கொடி கட்டுற நைலான் கயிறு ரெண்டு வாங்கிட்டுப் போயிருந்தேன். தனி ஆளா நானே ஸ்கேன்னரை வண்டியோட சுத்திக் கட்டி, மூணு முடிச்சுப் போட்டேன்(ஹி..ஹி... எல்லாம் ஒரு ப்ராக்டிஸுக்காகத்தான்)
இருபது கிலோமீட்டர் தாங்கணும்ல....

    அடுத்து புதுக் குழப்பம். வந்த வழி ஓகே. போற வழி எப்படி??? விசாரிச்சு குத்துமதிப்பா ஓட்டிட்டுப் போனேன். பின்பாரம், வழி தெரியாமைன்னு குழப்பத்துல போனவன், சிக்னல்ல மஞ்சள் விழுந்தும் நிக்காம க்ராஸ்பண்ணிட்டேன். கப்புன்னு புடிச்சிட்டான்யா... அங்க இரு 200 அழுதேன்.(500 ரூபாய் கொடுத்தா அழகா 200 மட்டும் எடுத்துட்டு சேஞ்ச் கொடுக்கிறான்யா போலீசு.) அதோட வழக்கம்போல அட்ரஸ் அவர்கிட்டயே கேட்டேன். குழப்பியடிக்காம வழி சொன்னாரு. வந்துட்டேன்....
ஓவர் சுய புராணமோ.... என்னங்க பண்றது...எழுதிட்டேன். இனி உங்க தலையெழுத்து....:)))))

வீட்டுக்கு வந்த விருந்தாளிகள் பட்ட பாடு

2011-06-28T23:42:00.000+05:30

முதல் படத்தில் இருப்பவர் கணேஷ்...போன வார நாட்களில் ஒரு நாள் மாலை அவனுக்கு ஃபோன் செய்து ‘கணேஷ்...! கால்கிலோ கறி எடுத்துருக்கேன். தனியா சாப்பிட மனசு கேக்கலை. வர்றியா’ன்னு கேட்டேன். அவனும் நம்பி வந்துட்டான். அவன் பேசிக்கா கன்னடமொழி பேசுபவன். தமிழும் தெரியும்(எழுத்துக்கூட்டி வாசிக்கவும் செய்வான்). வெங்காயம், பூண்டினை அவனருகில் தள்ளி, டிவிடியை ஆன் செய்தேன். என்னிடம் இருப்பது எல்லாம் 80ஸ் ஹிட்ஸ் மூவிதான். கொஞ்சமே கொஞ்சம் புதிய படங்களும் இருந்தன. இருவரும் ரசனையும் இங்கு ஒத்துப் போகலாமென்றெண்ணி, ‘ராமன் தேடிய சீதை’யைத் திரையிட்டேன்.அவன் சுவாரஸ்யமாகப் பார்த்துக் கொண்டிருக்கையில் ஆயுதத்தை மெதுவாக எடுத்து வைத்தேன்.கொஞ்சம் அலட்சியமாகப் பார்த்துவிட்டுப் படம் பார்க்க ஆரம்பித்தான். நான் எனது வேலையை ஆரம்பித்தேன். 8B Steadler பென்சிலில் கேர்ட்ரிட்ஜ் பேப்பரில் சும்மா கிறுக்குவது கூடச் சுகம்தான். இப்போது சப்ஜெக்ட் வேறு கிடைத்துவிட்டது. பத்து நிமிடங்களுக்குள்ளாக ஓரளவு முடித்துவிட்டேன். அடுத்த ஐந்து நிமிடங்களில் அடர்த்தியான ஏரியாக்களையும் பூர்த்தி செய்திட, இப்படம் உருவாகிவிட்டது.சமீப காலமாக நான் செய்த போர்ட்ரெய்ட்களில் எனக்குப் பிடித்தது இது. கேரக்டரோடு, உருவ அமைப்பும் 90 சதம் பொருந்திப் போனதில் மகிழ்ச்சி...

இதோ இந்தப் படத்துல இருக்கிறவரு மாரிமுத்து. நான் இந்தோரில் வேலை செய்கையில் பழக்கம். இவர் சென்னையில் வேலையிலிருக்கிறார். ஆறு மாத கால டெபுடேஷனுக்காக பெங்களூர் ஸ்டேஷன் வந்திறங்கினார். வெகு நாட்களாகக் கூப்பிட்டும் வராதவர், கடந்த சனியன்று என் ஸ்டூடியோவுக்கு (வேறொண்ணுமில்ல, என் வீடுதான் :) ) வந்தார். வழக்கம்போல் விருந்து, அப்புறம் டிவிடி படம்(வீடியோ பாடல்கள்-ராஜா-ஜானகி ஹிட்ஸ்)...வழக்கம்போல் ஸ்கெட்ச்சிங்...
முதல் இரண்டு அட்டெம்டுகள் மோசம். இது பரவாயில்லை. ஆனாலும் அவர் போல் இல்லை. இருந்தாலும் எனக்குப் பிடித்திருக்கிறது...அடுத்தவாரம் வருவதாகச் சொல்லி இருக்கிறார். பார்க்கலாம். பெட்டராக வரவைக்கலாம்....

லீலா பேலஸ் கார்டன் வியூ

2011-06-27T20:16:00.000+05:30

லீலா பேலஸ் கார்டன் வியூ-260611

கிட்டத்தட்ட ஒரு வருடத்திற்கு முன்னால் பதிவர் காலப்பயணி வசந்துடன் சென்று வந்தேன். பின் அந்த வழியாக அடிக்கடிக் கடந்தாலும் அதற்குள் நுழையவில்லை. நேற்று பென்சில் ஜாம்மர்ஸ் சங்கம இடம் அங்குதான். வழக்கம் போல தாமதமாகவே சென்றேன். உள்ளே பாரிஷ்டா காபி ஷாப்தான் மீட்டிங் பாயின்ட். ஒரு காபி 86 ரூபாய். ஹ்ம். காபி ஷாப்பின் நாற்காலி, மீசைகள் உட்புறமும், வெளியில் தோட்டத்திலும் போடப் பட்டிருந்தன. தோட்டத்தைப் பார்த்தவாறு பட்டறையைப் போட்டாச்சு...:)

பெயர் தெரியாத தாவரங்களும், தென்னை மரங்களும் மறைத்தது போக தெரிந்த உள் கட்டிடத்தின் மேல் பகுதிக் குறையை வரைந்தேன். பால் பாயின்ட் பென் இன் A5 சைஸ் ஸ்கெட்ச் புக்.

வண்ணமயமான தனிமை

2011-06-23T19:58:00.000+05:30

வெகுநாட்களுக்கு முன்பு வரையநினைத்தது. அப்போது பென்சிலில் மட்டும் வரைந்து விட்டேன். (இங்கே இருக்கிறது). K.B. Kulkarni என்ற ஓவியரின் படைப்பைப் பிரதியெடுத்தது. இது.அதன் பின் அந்தப் புத்தகத்தை சக ஜாம்மர்(பென்சில் ஜாம்மர்) வாங்கிச் சென்றுவிட்டார்.நானும் அப்படியே விட்டுவிட்டேன். இந்தவாரம்தான் என் கைக்குக் கிடைத்தது. இதுவரை ‘லூஸ் பெயிண்டிங்காகப்’ பண்ணிக் கொண்டிருந்தேன். இதில் வாட்டர்கலரில் கொஞ்சம் ‘டைட்டாக’ ட்ரை செய்தேன். பென்சிலில் மூன்று அல்லது நான்கு மணி நேரங்களில் செய்த வேலை வாட்டர்கலரில் முக்கால் மணி நேரத்தில் முடிந்துவிட்டது. ரொம்ப கண்ட்ரோல்டாக பெயிண்டிங் செய்தேன்.அளவு: A5 size (என் ஸ்கெட்ச் புக்கில்தான்)....

உங்கள் பார்வைக்கு எனது இப்புதிய முயற்சி... எனக்குப் பிடித்திருக்கிறது. இதுபோல் இன்னும் தொடரவேண்டுமென்பது என் எண்ணம்...

Work in Process....

மனசுக்குப் பிடிச்சது மட்டும்-100வது பதிவு...

2011-06-21T22:04:00.000+05:30

       மூன்று வருடங்களுக்கு முன் கிறுக்க ஆரம்பித்தேன் வலைப்பூவில். அந்தா இந்தாவென இப்போது 100வது பதிவு வந்துவிட்டது.பதிவெழுதுறேன் பேர்வழின்னு முன்னெல்லாம் யோசிக்காமக் கிறுக்குவேன். இப்ப கொஞ்சம் யோசிச்சுக் கிறுக்குறேன். எண்ணிக்கை முக்கியமில்லையெனினும், இவ்வலைப்பதிவு எனது பயிற்சிகளை,முயற்சிகளைப் பதிந்துவைக்க ஒரு நல்ல இடமாக இருப்பதால் எண்ணுவது கொஞ்சம் அவசியமாக இருக்கிறது.

      உங்க மனசுக்குப் பிடிக்குதோ, இல்லையோ, ஃபேசுபுக், டுவிட்டர், பஸ்களின் அணிவகுப்புகளில் பதிவுலகம் சோரம் போச்சோ இல்லையோ, இன்னமும் என் மனசுக்குப் பிடிச்சதா இருக்கு பதிவு போடுறது:)

    ஒரு சின்ன மகிழ்ச்சியோட, இதுவரைக்கும், வாழ்த்தியும்,ரசித்தும் வந்த அனைவருக்கும் நன்றியைத் தெரிவித்துக் கொள்கிறேன்...

      கடந்த ஞாயிற்றுக்கிழமை பென்சில் ஜாம்மர்ஸின் இலக்கு, பெங்களூர் MG சாலையை அடுத்துள்ள கமர்ஷியல் ஸ்ட்ரீட். பத்துமணிக்குமேல் பரபரப்பாக இருக்குமென்பதால், வெள்ளனவே அங்க போய்ட்டோம். இந்தவாரம் நான் தான் ஃபர்ஸ்ட்.8.30க்கெல்லாம் அங்க இருந்தேன். முதலில் ஒரு கட்டிடம், மாருதி ஸாரி உத்யோக் லிமிட்டெட். நான் வரைய ஆரம்பிக்கிறப்போ பூட்டியிருந்தது. ஷட்டர்கிட்ட நான் வர்றப்போ, கடையைத் தொறந்திட்டாங்க. கட்டிட்ங்கள் வரைவதில் இருக்கும் பெர்ஸ்பெக்டிவ் சவால் வேறெதிலும் கிடையாது. பால்பாயிண்ட் பென்னில் வரைந்து பழகுவதால் கொஞ்சம் கவனத்தோடுதான் ஆரம்பித்தேன். மூன்று இடங்களில் படிக்கட்டுகள்.ஓவரா இம்சையைக் கூட்டிருச்சு.ஒருவழியா பத்தரைக்கிட்ட முடிச்சிட்டேன்.(90 சதவீதம்). மீதி வீட்டில் வந்து ஃபைனல் டச்சப் கொடுத்தேன்.
கன்னட எழுத்துக்களை அங்கேயே எழுதியிருக்கலாம், விட்டுவிட்டேன். அதான் ஜிலேபியாப் பிச்சுப் போட்டிருப்பேன்....

அடுத்து இன்னும் கொஞ்சம் முன்னேறி, வீதிக்குள்ளாக நுழைந்துவிட்டோம். எல்லோருக்கும், பழைய , சற்று இடிபாடுள்ள கட்டிடங்கள்தான் இலக்கு. நான் மட்டுமா அதில் விதிவிலக்கு? அப்படிக் கிடைத்ததுதான் இந்த ஹேண்ட்லூம் செண்டர்.இந்நேரத்தில் கிட்டத்தட்ட எல்லாக் கடைகளும் திறந்துவிட்டிருந்தன.அகலம் குறைந்த கடைகளின் முன்னே, வாயிலையும் முழுதும் அடைக்காமல், அவர்கள் வியாபாரமும் பாதிக்கப்படாமல் எங்கள் வேலையைத் தொடர்ந்தோம். அமர்ந்தும், நின்றும் வரைந்ததில் ‘பெர்ஸ்பெக்டிவ்’ கொஞ்சம் பாதிக்கப்பட்டிருக்கிறது. ஓகே ரகம்தான்.கொஞ்சம் ஹோம் ஒர்க் தேவை...

நூறாவது பதிவுக்கு, புது டெம்ப்ளேட் போடலாம்னு இருந்தேன். ரொம்ப சோம்பேறித்தனமா இருக்கு. மெதுவாப் பார்த்துக்கலாம்.(எல்லோரும் பஸ்ஸிலதான் வந்து ஏறுறாங்க...:) )

டிஸ்கி 1: எப்பவும் அரைகுறையா மொபைல்லதான் படம் எடுத்துப் போடுவேன். ஸ்பெஷல் பதிவுன்றதால, மெனக்கெட்டு ஸ்கேன் பண்ணிப் போட்டேன். ஒரு நல்ல , சீப்பான ஸ்கேன்னர் தேடிட்ட்ட்ட்ட்ட்டேஏ இருக்கேன். ஆப்புட மாட்டேங்க்யுது. எப்சன்ல ஒண்ணு சொல்றான். ஆத்தி நாலாயிர்ரூவா ஆகுது.பாப்போம்.

டிஸ்கி 2: புது அறைக்கு தனிக்குடித்தனம் வந்துவிட்டேன்.(பேச்சிலர் தனியா வீடு எடுத்துப் போறதுதான உண்மையிலேயே தனிக்குடித்தனம். ம்ஹ்ம். இது தெரியாம தப்பாப் பேசிட்டு திரியுறாய்ங்க.) வீடு ஓரளவு வசதியாக உள்ளது. இனிமேல் வாட்டர் கலர் முயற்சிகள் அடிக்கடி வருமென நம்புகிறேன். எல்லோர்கிட்டயும் ஓப்பனா சொல்லிட்டா, அதுக்காகவாவது பண்ணுவேன்னு ஒரு ஆசைதான்....

திகிலான செங்கல்பட்டு பயணம் 120611

2011-06-18T23:52:00.000+05:30

கடந்த 12ந்தேதி நண்பர் ஒருவரின் திருமணத்திற்காக செங்கல்பட்டு சென்றிருந்தேன்.( என்னைக்குத்தான் என் திருமணத்திற்காகப் போகப் போறேனோ? :) ) சனி இரவு கிளம்பி ஞாயிறு காலை காஞ்சிபுரம் வழியாக செங்கல்பட்டு சென்றடைந்தேன். 8 முதல் 8.30 மணி நேரம்தான். திருப்பூட்டு முடிந்து இட்லி, செட் தோசை, பூரி, பொங்கல், பஞ்சாமிர்தம் மட்டும் சாப்பிட்டுவிட்டு உடனே பெங்களூர் திரும்பிவிட்டேன்...

அந்தப் பயணத்திற்கான நினைவுக் கோடுகள் இதோ...
முதல் ஸ்கெட்ச் செங்கல்பட்டு அவுட்டோரில் ஒரு பேருந்து நிலையத்தில் காத்திருந்தபோது வரைந்தது.

இது வெல்லூர் பேருந்து நிலையத்தில் பேருந்தில் அமர்ந்திருந்தபோது சுற்றும் முற்றும் பார்த்து வரைந்தவை. அந்தக் குண்டு மனிதர் இண்டெரெஸ்டிங் சப்ஜெக்டாகத் தெரிந்தார். கறுப்புக் கண்ணாடி அணிந்திருந்த, வெள்ளைச் சேலை மூதாட்டி ஒருவர் ‘சித்திரம் பேசுதடி’ பாட்டியை நினைவூட்டினார்....வரைந்து முடிப்பதற்குள் பேருந்த் கிளம்பிவிட்டது (வேலூரில் சாப்பிட்ட முட்டைப் ப்ரியாணி அருமை. கத்தரிக்காய் தாளிச்சா பிரமாதம்)

இங்கு உள்ள படத்தின் மேற்பகுதி, எனது இருக்கையில் இருந்து பேருந்தின் மேற்புறம் பார்த்து வரைந்தது. பேருந்தில் கண்டக்டர் அமரும் ஒற்றை இருக்கைக்குப் பின்புறம் உள்ள இருக்கையில் சன்னலோரம் அமர்ந்திருந்தேன். வெல்லூரில் ஏறியவுடன் தூங்கிவிட்டேன். இரு மணி நேரங்களுக்குப் பிறகு முழித்தேன். பக்கத்தில் இருந்தவர், தோளில் அவர் கைகளால் இடித்துச் சைகை காட்டினார். அவர் காட்டிய இடம் ஓட்டுநரின் இருக்கை. அங்கு பார்த்தால் , வண்டியை ஓட்டியவாறு சற்றுக் கண்ணயர்ந்திருந்தார் ஓட்டுநர். எனது தூக்கமெல்லாம் பக் கென்று பறந்தோடிவிட்டது. எஞ்சினின் மேல் அமர்ந்திருந்த ஒரு பயணியிடம் , அவரைக் கவனிக்கச் சொல்லி கண்ணாட்டினேன். அவர் திரும்பிப் பார்க்கையில் , சற்றுச் சுதாரித்த ஓட்டுநர், ‘என்ன்?’ என்பதுபோல் தலையாட்டினார். போதும்டா சாமி என மனதுக்குள் நினைத்துக் கொண்டேன்...பிறகு எனக்கெப்படித் தூக்கம் வரும். எனது ஸ்கெட்ச் புக்கைக் கையிலெடுத்தேன். எனக்கு முன் மேற்புறம் ஓடாத டிவி பெட்டி இருந்தது. வரைய ஆரம்பித்தேன். அதனருகில் சிடி ப்ளேயர் வைக்கும் பெட்டியினுள்ளிருந்தது வாட்டர் பாட்டில்கள்தான்....:)
இப்படத்தின் கீழே உள்ள படத்தில் எனக்கு நேராக முன்புறம் உள்ள இடத்தை வரைந்துள்ளேன். இப்படத்திலுள்ள வரையும் கை என்னுடையதுதான்....:)))

இசையென்னும் தவம்-இளையராஜா-டாப் டென் -வாழ்த்து-பென்சில்

2011-06-02T03:00:00.000+05:30

   ஜூன் இரண்டாம் நாள் பிறந்தநாள் காணும் இசைக்கு பிறந்தநாள் வாழ்த்துக்களைத் தெரிவித்துக் கொள்கிறேன்.இன்னும் நிறைய நிறைய எதிர்பார்க்கிறேன். இந்த ஒரு விஷயத்தில் மட்டும் என் பேராசையைக் கட்டுப் படுத்த முடியாது....:)

அவர் பாடல்களை வரிசைப் படுத்துவது இயலாது.சட்டெனத் தோன்றியதில் எனக்குப் பிடித்த டாப் டென்...
1.மாலையில் யாரோ மனதோடு பேச...(சத்ரியன்)
2.முத்துமணி முத்துமணி (அதர்மம்)
3.தென்றல் வந்து தீண்டும்போது என்ன(அவதாரம்)
4.எங்கெங்கோ செல்லும் என் எண்ணங்கள்(பட்டாக்கத்தி பைரவன்)
5.கண்ணன் ஒரு கைக்குழந்தை(பத்ரகாளி)
6.ஆகாசம் ஏனாதிதோ அனுராகம் ஆனாதிதே(தெலுங்கு-Nireekshana)-சங்கத்தில் பாடாத கவிதையின் சுந்தரத் தெலுங்கு வடிவம்.
7.ஆராரோ பாட்டுப் பாட நீயும் தாயில்லை(பொண்டாட்டி தேவை-(இது எனக்குத் தேவைதான் இப்போ :)   ))
8.கண்மணி நீ வரக் காத்திருந்தேன்(தென்றலே என்னைத் தொடு)
9.முத்தம்மா முத்து முத்து முத்தாளம்மா(தந்துவிட்டேன் என்னை)
10.விழியிலே மணி விழியிலே(நூறாவது நாள்)-ஜோதியல்லி(கீதா-கன்னடம்)....

   ஹ்ம்.... பட்டியல் தொடர்ந்துகிட்டே இருக்கு....
இந்த எல்லாப் பாடல்களையும் கேட்டுக்கிட்டே பண்ண படம் இந்த ஓவியம். பென்சிலில் வரைந்தது. ஆனாலும் ரப்பர் உபயோகிக்கவில்லை.கார்ட்ரிட்ஜ் பேப்பர்....

தேசிய விருது பெற்ற திரைச்சீலை ‘ஜீவா சார்’

2011-05-28T01:22:00.000+05:30

   2010 ஆம் ஆண்டுக்கான , திரைப்பட ஆய்வு குறித்த தேசியவிருது பெற்ற ஜீவாநந்தன் சாரை வாழ்த்துகிறேன்...
முகப்புத்தகத்தில் தான் நண்பராக அறிமுகமானார். இளையராஜாவின் இசையில் இன்னும் நெருக்கமானோம்...
   இவர் திரைப்படங்களுக்கு பேனர் வரைவதைத் தொழிலாக வைத்திருந்தாலும், வக்கீல் படித்தவர்...இந்திய, உலகப் படங்களைப் பற்றி விமர்சனங்கள் எழுதியிருக்கிறார்.(நான் படித்ததில்லை. படிக்கவேண்டும்.)
   எனினும் எனது அனைத்து கிறுக்கல்களுக்கும் அவர் போடும் ‘லைக்’ ஒரு தனிக் கிறக்கத்தை என்னுள் ஏற்படுத்தி, என்னை ஊக்குவிக்கும்....

சமீபத்திய வருத்தம், கடந்தமாதம் கோவை சென்றிருந்தும், ஒரு இனம்புரியாத தயக்கத்தால், அவரைப் பார்க்காமல் வந்து விட்டேன் . வருத்தம்தான்...
   வாராவாரம், குழ்ந்தைகளுக்கு, இன்னும் சில ஓவியர்களுடன் சேர்ந்து ஓவிய வகுப்புகள் நடத்திவருகிறார்...
   மென்மேலும் சிறக்க எனது வாழ்த்துக்கள்...
சார்க்கோலில் கார்ட்ரிட்ஜ் பேப்பரில் வரைந்த ஒரு அவசர ஓவியம்....

எனது வார இறுதி-சல்மா,தனுஷ்,சுஜாதா,பிம்பா

2011-05-22T20:51:00.000+05:30

நேற்றைய இரவின் இரண்டாம் ஜாமம் முழுவதும், சல்மாவின் ‘இரண்டாம் ஜாமங்களின் கதை’யே ஆக்கிரமித்துக் கொண்டிருந்ததனால், காலை ஐந்து மணிக்குத்தான் தூங்கப் போனேன். இன்னொரு அத்தியாயம், இன்னொரு அத்தியாயம் என உள்ளே இழுத்துக் கொண்டே செல்கிறது கதை. நமக்கு அதிகம் அறியாத முஸ்லீம் மக்களின்(பெண்களின்) வாழ்க்கையை ,பெண்களின் வழியாகவும், அவர்களின் பேச்சுக்களின் வழியாகவுமே அறியச் செய்கிறார்....

      குறியீடு, பின் நவீனத்துவம்,இசம், ரசம் என எத்தகைய வெங்காயங்களும் இல்லாமல், இயல்பான உரையாடல்களிலேயே நகர்ந்து செல்கிறது கதை.கதாபாத்திரங்களும், அவர்களின் பெயர், உறவுமுறைகள் நினைவில் வைக்க முதலில் சிரமமிருந்தாலும், கதையோட்டத்தில் பழகிப் போய்விடுகிறது...இன்னும் முடிக்கவில்லை.இரு நாட்களில் முடித்துவிடலாம்.

                          *******************************************************

   சன் டிவியில் ‘ஒத்த சொல்லால’ பாட்டு அமர்க்களப் படுகிறது. முதல் நாள் தியேட்டரில் பார்க்கும்போதே ஆடத் தூண்டிய பாடல். சூப்பர்...
                          ********************************************************
சுஜாதாவின் ‘தீண்டும் இன்பம்’ எடுத்தேன். அரைநாளில் முடித்துவிட்டேன். ஒரே வார்த்தையில் சொல்வதானால் ‘குப்பை’.

படு செயற்கை...:(((((((

                        **********************************************************

இடைப்பட்ட நேரங்களில் ஒரு அனாட்டமி ஸ்டடிக்காக ஒரு பென்சில் ஸ்கெட்ச் ஓடிக் கொண்டிருக்கிறது.நாளைக்குள் முடிக்கத் திட்டம்...ஸ்டெட்லர் பென்சிலில் வரைவதே தனி சுகானுபவம். என்ன ஒரு 8B பென்சிலின் விலை மட்டும் 50 ரூபாய்தான் :)

                         ********************************************************
   இன்று காலையில் வெகுதாமதமாக பத்து மணிக்குத்தான் எழுந்தேன். இன்றைய வீக் எண்ட் ஜாம் ஆக்டிவிட்டி, பசவனகுடியில் உள்ள ‘பிம்பா ஆர்ட் ஃபவுண்டேசன்’ இல். எல்லாமே புது இடங்கள் என்பதால் வெள்ளி மாலை அலுவலகம் விட்டு வரும்போதே A3 size ஷீட்டில் மேப் பிரிண்ட் அவுட் எடுத்துக் கொள்வேன்.மேப்பில் எளிதாக இருக்கும் வழி, நேரில் சென்றால் மட்டும் குழப்பியடிப்பதேன். எங்கெல்லாம், இரு பாதைகள் பிரியுமோ, அந்த இடத்தில் வந்ததும், தலைமுடியைப் பிய்த்துக் கொள்ளத் தோன்றும். ஹெல்மெட் இருப்பதால் அதற்கு வழியில்லை. மிகச் சரியாக , தவறான பாதையில் போய்விடுவேன். பின் நீண்ட தூரம் சென்று யாரிடமாவது கேட்டு, யு டர்ன் எடுத்து வர வேண்டும்...கூகிள் மேப்பை விடவும் சிறந்தவர்கள் ஆட்டோக்காரர்கள்.நன்றி....

          பிம்பா ஆர்ட் ஃபவுண்டேஷனில் ஓவியம், இதர கலைகள் சொல்லிக் கொடுக்கிறார்கள். 100 வருடப் பழமையானது இந்நிறுவனம். பலவித கலை வேலைப்பாட்டுப் பொருள்கள் சேகரித்து வைத்திருக்கிறார்கள்.,..
நான் போன நேரம் 12 மணி. குழுவில் மற்றவர்கள் அந்நேரம், அங்கே நடக்கும், ‘ராசலோக்’ எனும் தோல்பாவைக் கூத்தைக் காணச் சென்றுவிட்டனர்.நான் வெளியில் இருந்த ‘சூரிய நாராயணனின்’ சிலை’யை வரைய ஆரம்பித்துவிட்டேன். 75 நிமிடங்கள் பிடித்தது.பால் பாயிண்ட் பென்னில் வரைந்தது...

மொட்ட மாடி மொட்ட மாடி...

2011-05-19T13:25:00.000+05:30

நண்பர் மகேஷ் எடுத்த புகைப்படம்தான் இதற்கு ரெஃபரென்ஸ்...வாட்டர்கலரில் செய்தது...

மதுரை மெஸ் 140511

2011-05-15T13:00:00.001+05:30

நேற்றைய நாள் முழுவதும் ஊர் சுற்றல்தான். காலையில் ‘அழகர்சாமியின் குதிரை’ டிவிட்டர் நண்பர் TBCD யுடன் சென்றேன். கே.ஆர் புரம் புஷ்பாஞ்சலி திரையரங்கம். டிக்கட் விலை 70 ரூபாய்தான். அழகாகப் பராமரிக்கிறார்கள் திரையரங்கை. சீட்டுகளும் நன்றாக உள்ளது. ஒரே குறை AC போடவில்லை. சரி மின்விசிறியாவது போடலாமல்லவா? அதுவும் இல்லை. வியர்க்க விறுவிறுக்கப் படம் பார்த்துவிட்டு வந்தோம்.
எதிர்பார்த்துப் போன அளவுக்கு படம் இல்லை. ஆனால் நல்லதொரு படம். எடிட்டிங்கில் இன்னும் கவனம் செலுத்தியிருக்க வேண்டும். சுசீந்திரனின் முந்தைய இரு படங்களை ஒப்பிடுகையில் இது ஒரு மாற்றுக் குறைவுதான்.இளையராஜாவின் இசை நன்றாக இருந்தது. எனினும் மேற்கத்திய இசை இல்லாமல், நமது இசையையே வழங்கி இருந்தால் ஏகப் பொருத்தமாயிருந்திருக்கும். ஆரம்பத்தில் வரும் ‘அடியே இவளே’ பாடலைப் போலவே, படம் முழுக்க இசையமைத்திருந்திருக்கலாம். க்ளைமேக்ஸ் எனக்குப் பிடித்திருந்தது.மெல்லிய நகைச்சுவையோடிய படம்.சுசீந்திரனிடம் இருந்து இன்னும் எதிர்பார்க்கிறேன்....

மதியம நந்தினியில் மினிமீல்ஸ் முடித்துவிட்டு, நேரே வண்டியை அவென்யூ ரோட்டுக்கு விட்டேன். இரண்டரைமணி நேரம். ட்ராஃபிக் ஜாமிலேயே ஒரு மணி நேரம் போய்விட்டது. அங்கு சென்றபிறகுதான் தெரிந்தது. அது ஒரு ரங்கநாதன் தெரு என்று. அங்கு இருபுறமும் பெயர்ப் பலகைகளைப் பார்த்துக் கொண்டே வண்டியை நகர்த்திக் கொண்டிருந்தேன். ஒரு வழியாகக் கண்டுபிடித்து பர்ச்சேஸ் முடித்துவிட்டுக் கிளம்புகையில் மழை ஆரம்பித்துவிட்டது. அரைமணி நேரம்தான்.அதன் பின் மழையில்லை. திரும்புகையில் ஜில்லென்றிருந்தது. மாலையும், கொஞ்ச நேரம் பெய்த மழையும் பயணத்தை இனிதாக்கியது.
வீடு திரும்பும் வழியில், மாரத்தள்ளி தள்ளி, ஒயிட்ஃபீல்ட் ரோட்டில் இருக்கும் ‘மதுரை மெஸ்’ சென்றேன். அங்கு தோசைகளை ஆர்டர் செய்துவிட்டுக் காத்திருந்ததால்தான் இப்படமும், இப்பதிவும் வந்தது. இங்கு உணவு அவ்வளவு நன்றாகவுமிருக்காது. அவ்வளவு மோசமாகவுமிருக்காது...(ஒரு செனரல் நாலெட்ஜூக்குதான்) :)))

எங்க வீட்டுக் குட்டி கொடுத்த போஸ்கள்

2011-05-09T22:58:00.000+05:30

கோவி...என் சகோதரர் பையன்...
அவனை ஒழுங்கா போஸ் கொடுடான்னா, கொடுக்க மாட்டான். அதான் அவன் தூங்கினப்போ வரைஞ்சது இந்தப் படங்கள்...
ஊருக்குப் போனவுடன் ஒரு மண்வண்டி(டிப்பர் லாரி) வாங்கிக் கொடுத்தேன்.ரெண்டு நாள் முழுக்க அதுகூடதான் அவனோட விளையாட்டு. சாப்பிடப் போறப்போ, தூங்கப் போறப்போ, வெளிய கிளம்பற்ப்போ எல்லா நேரத்திலயும், அவன் கைல அதான் இருந்தது.
இப்பத் தூங்குறப்போ அது பக்கத்துல இருந்தது. நான் தான் படத்தைக் காம்ப்ளிகேட் பண்ண வேணாம்னு அத விட்டுட்டு வரைஞ்சேன்...
செம வாலு....

இதுதான் அவனோட ஃபேவரைட் போஸ். ஒரு கைவிரலைச் சப்ப ஆரம்பிச்சு, இன்னொரு கை விரலால, அரைநாண் கயிற்றைப் பிடிக்க ஆரம்பிச்சுட்டானா,அவன் ஆழ்ந்த தூக்கத்துக்குப் போகப் போறான்னு அர்த்தம்.....

ச்ச்சோ ச்வீட்.........!

கோவைப் பயணம் - கிறுக்கல் குறிப்புகள்

2011-05-09T20:38:00.000+05:30

05 மே 2011- இரவு 9மணி-அத்திப் பள்ளி முதல் ஹோசூர் வரை- டவுன்பஸ் பயணம்...நெடுஞ்சாலையில்..
பஸ்ஸின் வேகத்துக்கு ஈடு கொடுக்க முடியாமல் திணறினேன்....

05 மே 2011- இரவு 11மணி.ஹோசூர் ரயில் நிலையம் இரவு....நிதானமாக, ஆனால் ஐந்து முதல் 15 செக்கண்டுகளுக்குள்ளாக முடிக்கப்பட்டது ஒவ்வொரு படமும்....

06 மே 2011- இரவு 9மணி.காநதிபுரம் பஸ்நிலையத்திலிருந்து சிங்காநல்லூர் நிலையம் வரை-டவுன்பஸ் பயணம்-ஆனால் நகர்ச் சாலைகளில்...அடிக்கடி நின்றது. ஆனால் குலுக்கல் அதிகம்....

05 மே 2011- இரவு 11 மணி.-சிங்காநல்லூர் பேருந்து நிலையத்தில் பஸ்ஸில் அமர்ந்தவாறு

(தமிழ்ப்)பறவை(ப்) பார்வையில் பைக்

2011-05-09T07:12:00.000+05:30

நண்பனின் நிச்சயதார்த்தத்துக்காக கடந்த வெள்ளியன்று கோவை சென்றிருந்தேன். காந்திபுரம் கவிதா தியேட்டரை ஒட்டியுள்ள ஸ்ரீனிவாஸா லாட்ஜில் இரண்டாவது மாடியில் தங்கியிருந்தேன். மாலை நேரம் அறையைவிட்டுக் கிளம்பும்முன், பக்கத்து அபார்ட்மெண்டின் தரைத்தளத்தில் நிறுத்தப் பட்டிருந்த இந்த அப்பாச்சி கண்ணையும், கையையும் உறுத்தியது. சுட்டுட்டேன்....

பால்பாயிண்ட் பென்னில் கிறுக்கியது. முக்கால்வாசி முடிவடைந்த நிலையில் வண்டிக்காரர் பைக்கை எடுத்துச் சென்றுவிட, என் மொபைலில் முன்னெச்சரிக்கையாக எடுத்துவைத்திருந்த ஃபோட்டோவை ஜூம் பண்ணிப் பண்ணி ஷேடிங்கை முடித்தேன்.

Illusion- Lady and the dog

2011-05-04T20:39:00.000+05:30

     Illusion ட்ரை பண்றதுக்காக, இந்தப் படத்தையும், இந்தப் படத்தையும் கலந்து கட்டி வாட்டர்கலர் பண்ணப்போ வந்த ரிசல்ட் இது. :(
கரெக்ட் பண்ண முடியலை...போய்த் தொலையுதுன்னு அப்டியே விட்டுட்டேன்...
ப்ளான் பண்ணாம எதுவும் பண்ணக்கூடாது.

    சரி.இதையும் பார்த்துட்டுப் போயிடுங்க...இதுவும் கடந்து போகும்...:)

நேரடி உருவப் படங்கள் பயிற்சி

2011-05-02T21:38:00.000+05:30

கடந்து சென்ற வார இறுதி முழுவதும் வேலை இருந்தது. வேலை என்றால், கரும்பு தின்னுவதுதான். பெங்களூரில் பென்சில்ஜாம் ஸ்டூடியோவில் ,’உருவப்படங்கள்’ வரைவது பற்றிய ஒரு பட்டறை இரு நாட்களாக நடந்தது.

நேரடி உருவப் ப்டங்கள் வரைவது பற்றிய என் முழு எண்ணத்தையும் தகர்த்துத் தூளாக்கிவிடடது. நான் கற்றுக் கொண்டவற்றைச் சிறிது பகிர்கிறேன்.

நேரில் பார்த்து அப்படியே வரைவதல்ல அது. மாடலின் கேரக்டர்களையும், அவர்களின் எக்ஸ்பிரஷன்களையும் சொல்ல வேண்டும்.சொல்லும் விதங்கள்தான் வேறு. photo realistic, Impressionism, expressionism என்ற வகைகள்.ஆனநதவிகடனில் பார்க்கும் இளையராஜாவின் ஓவியங்கள் ஃபோட்டோ ரியலிஸ்டிக் வகையைச் சேர்ந்தது எனினும் அது தெளிவாக எக்ஸ்பிரஷன்களையும் தந்துவிடுகிறது.

இம்பிரஷனிஸம் வகையில், உற்று நோக்கின் வெறும் கிறுக்கல்கள் மட்டுமே தெரியும்.ஆனால் பொதுவாகப் பார்க்கையில் குறிப்பிட்ட மாடலின் கேரக்டரையும், எக்ஸ்பிரஷன்களையும் சொல்லிவிடும்.இது ஓவியரின் திறமைக்கு நல்லதொரு சான்றாகும்.இதற்கு முந்தைய பதிவில் போட்ட ‘இளையராஜா’ ப்டம் இவ்வகையில் நான் முயன்றதாகும்.

எக்ஸ்பிரஷனிசம் வகைகளில் மாடலின் உருவம் தெள்ளத் தெளிவாக இல்லாவிடினும் அவரது எக்ஸ்பிரஷன்கள் தெளிவாகத் தெரிந்துவிடும்.

மேற்கண்ட இரு படங்களிலும் இருப்பவர் ஒரே மாடல்தான். வரைந்த விதம் வேறு.அவங்க மாதிரியே இருக்காது :) நான் வழக்கமாக வரையும் பாணியில் வரையாமல், அங்கு பயின்றதை வரைந்தேன்.(குண்டுச்சட்டில எத்தனை நாள் குதிரை ஓட்டுறது)...முதல் படம் ‘எக்ஸ்பிரஷனிஸம்’ வகையில் சாஃப்ட் பேஸ்டலில் வரைந்தது. இரண்டாவது படம் பென்சிலில் வரைந்தது.

நேற்று ஒரு 6 மணி நேரம் மாடலாக அமர்ந்திருந்தார்கள். ஒவ்வொரு பதினைந்து நிமிடங்களுக்கு ஒருமுறை ஓய்வு. ஓய்வின்போது நானும் சக பயிற்சியாளர்களும்(அவங்க ரெண்டுபேரும் பெங்களூர் பொண்ணுங்கதான் :P), அந்த அம்மாவிடம் கேட்டோம், ‘மாடலாக அமர்ந்திருக்கும் போது என்ன நினைத்துக் கொண்டிருந்தீர்கள்’ என....

அவரின் பதில் பட்டென விழுந்தது,” என் பிள்ளைகளைத்தான். ரெண்டும் சின்னப் பையங்க. வீட்ல விட்டுட்டு வந்திருக்கேன், இந்நேரம் என்ன பண்ணிட்டுருக்குதுங்களோ...போன வாரம் இப்படித்தான் நான் வெளிய் போய்ட்டு வர்றதுக்குள்ள, கேஸத் தொறந்து விட்டுட்டான் ஒருத்தன். அதான் கொஞ்சம் ப்யம்னு’ சொல்லி முடித்தார்.

உலகத்துல எல்லா அம்மாக்களும் இப்படித்தான் போல.அம்மாக்களின் உலகத்தில் குழந்தைகள்தான் எல்லாமும்....

மேற்கண்ட இரு படங்களும் முதல்நாள் பயிற்சியில் ஒரு வயதானவரை மாடலாக வைத்து வரைந்தது. (இடையில் மாடல் தூங்கிவிட்டார் என்பது வேறுவிஷயம். அது அடுத்தடுத்த படங்களில் தெரியவரும்.) இம்பிரஸனிஸம் வகை.எல்லாமே க்விக் ஸ்கெட்சஸ். இன்னும் 7,8 படங்கள் இருக்கிறது. எல்லாம் பதிவிடவில்லை.

சாஃப்ட் பேஸ்டலில் செய்தது.(முதல்முறை இந்த மீடியம் பயன்படுத்தினேன்.) பரவாயில்லை நன்றாகவே வருகிறது. இதில் மேலும் சில எக்ஸ்பெரிமெண்ட்ஸ் பண்ண வேண்டும்.

இதுவும் சாஃப்ட் பேஸ்டல்தான்.

இது சார்க்கோலில் செய்தது....

மேற்கண்ட மூன்றும், அதே மாடல்தான். எக்ஸ்பிரஷனிஸம் வகையில் செய்தது. க்விக் ஸ்கெட்சஸ்....

மனிதத் தலையின் உள்ளமைப்பை அறிந்து கொள்ள, களிமண்ணில் சிறியதும், பெரியதுமாக மண்டை ஓட்டின் மாதிரி செய்தோம். இதை வைத்து ஸ்ட்ரக்சரை வரைந்து பயிற்சியெடுத்துக் கொண்டோம்...

பொதுவாகக் கற்றுக் கொண்டது, ‘கற்றது கையளவு, கல்லாதது உலகளவு’ ,

விளைவுகளை விட முக்கியமானது வழிமுறைதான்....

கற்றுக் கொடுத்த ஸ்மிதா சிவசாமிக்கு நன்றி.

இது ஒரு ஆவணப் பதிவு எனக்கு. உங்களுக்குப் பிடித்திருந்தால் இது ஒரு நல்ல பகிர்வாகவும் எண்ணிக்கொள்கிறேன்....

அப்பாடா, ரொம்ப நாளுக்கப்புறம் நீளமாப் பதிவு எழுதியாச்சு....:)

இளையராஜா-சலிக்கவே சலிக்காத மனிதர்....

2011-04-30T23:48:00.000+05:30

பதிவெழுத வந்த மூன்றாண்டுகளில் முதல்முறையாக இந்த மாதம்தான் அதிகப் பதிவு(இது இம்மாதத்தின் 9வது பதிவு) வரவேண்டுமென்பதால், ஒரு க்விக் ஸ்கெட்ச்...அதற்கு நம்ம தலைவரை விட்டா யார் இருக்காங்க...??? :)

அதனால, நான் இப்ப கத்துட்டு வர்ற Impressionism style la 6,7 நிமிடங்களுக்குள்ளாக வரைந்த படம் இது... பால்பாயிண்ட் பென்னே துணை....!

மீரா ஜாஸ்மின் - எனக்குப் பிடித்த நடிகை...!

2011-04-30T01:03:00.000+05:30

ரொம்ம்ம்ம்ம்ம்ப நாள் கழிச்சு பால்பாயிண்ட் பென்னால, ஒரு க்ளோஸ் போர்ட்ரெய்ட் சின்சியரா ட்ரை பண்ணினேன். எங்கேயோ சொதப்பிடுச்சு. இருந்தாலும் மொத்த எஃபக்ட் எனக்குப் பிடித்திருக்கிறது.

எனது கவனக் குறைவினால், இடது கன்னத்தில் பேனா மை சிறிது தேவையில்லாமல் கொட்டிவிட்டது. ம்ஹ்ம்...திருஷ்டிப் பொட்டுன்னு வச்சிக்கலாம்...:)

மீராவிடம் பிடித்ததே, அந்தக் குறும்புச் சிரிப்பும், கண்களும்தான்...அதைக் கொண்டு வர மிக முயற்சியெடுத்தேன். பரவாயில்லை...

’கஸ்தூரிமான்’ படத்தில் வரும், ‘கேக்கலையோ கேக்கலையோ கண்ணனது கானம்’...தினமும் காலை நான் கேட்டு ரசிக்கும் மீராவின் பாடல்...அஃப் கோர்ஸ் ராஜாவின் பாடல்தான்....

லவ்லி மீரா...

ஒரு பறவையே/பறவையை வரைந்தது

2011-04-28T23:57:00.000+05:30

Great-crested-grebe in water colors... Donno abt the bird...drawn for John James Audubon's 226th Birthday (Pencil Jam - Drawing Bootcamp)

பழமாய் இருப்பதால் மிளகாய் இனிக்குமா?

2011-04-25T01:36:00.000+05:30

இன்னுமொரு நீர்வண்ண ஓவியமுயற்சி. ரெஃபரென்ஸ் படம் நெட்டில் இருந்து எடுத்தேன்...

கொஞ்சம் இல்ல அதிகமாகவே ஓவர் ஒர்க் ஆயிடுச்சு. இனிஷியல்லி வாஷஸ் நல்லா வந்தது. கடைசியில் கொஞ்சம் சொதப்பிடுச்சு,....:(

இளையராஜா-White in Black-Music messiah

2011-04-23T02:55:00.000+05:30

முதல்முறையாக கறுப்புத்தாளில்(வெள்ளைத்தாளில் கறுப்பு வண்ணம் பூசிக் காயவைத்தது) வெள்ளை வண்ணத்தில் வரைந்து பார்த்தேன்.இப்படம் நன்றாக வந்ததற்குக் காரணம் இளையராஜா மட்டுமே... ஐ லவ் இளையராஜா

medium-Oil colors(black & white)

Bangalore Palace in watercolor Live sketch 17-04-11-ஓவியம்

2011-04-19T00:15:00.000+05:30

நேற்று நடந்த பென்சில் ஜாம் நிகழ்வில் எனது பங்களிப்பு....முக்கால்வாசி அங்கேயே வரைந்தது. ஃபினிஷிங் டச்சஸ் வீட்டில் வந்து கொடுத்தேன்...

NGMA-Bangalore-31st sketch crawl-pen sketch-ஓவியம்

2011-04-17T08:29:00.000+05:30

உலகளாவிய 31 வது Sketch Crawl நிகழ்விற்காக நேற்று (16-04-11), பெங்களூர் பேலஸ் ரோட்டிலிருக்கும் National Gallery of Modern Art சென்றிருந்தேன். காலதாமதமாகச் சென்றதால் ஒரு படம் மட்டுமே வரைய முடிந்தது.உள்ளே சுற்றிப் பார்க்கவில்லை. வெளியே இருந்த படிக்கு, கட்டிடத்தின் ஒரு பக்கத்தை மட்டும் பால்பாயிண்ட் பென்னில் வரைந்து முடித்தேன். திருப்தியளித்த ஒரு படம் இது எனக்கு...

கோடுகள் கோடுகள் மற்றும் கோடுகள்-pen ஓவியம்

2011-04-11T21:35:00.000+05:30

இருக்கும் படத்தின் வெளிச்ச, அடர்த்தி வேறுபாடுகளை ஷேடிங் பண்ணாமல், கோடுகளின் அளவு, இடைவெளி, வளைவுகள் வைத்து வேறுபடுத்த முயற்சித்த ஓவியம் இது....

பால்பாயிண்ட் பென்னில் வரைந்தது....ரெஃப்ரென்ஸ் படம் இங்கே...

கிராமக் காட்சிகள்-Live sketches by pen

2011-04-05T07:31:00.000+05:30

யுகாதி விடுமுறைக்காக ஊருக்குச் சென்றிருந்தேன். அங்கு கிறுக்கியவைகளில் சில.

A5 sheet- Ball point pen

இது ஊருக்கு வெளியே உள்ள நீர் வற்றிய கண்மாயில் இருக்கும் ஈஸ்வரன் கோயில்.

என் வீட்டுக் கதவு வழியே வெளிப்பார்வைத் தோற்றம்

முந்தைய படத்தில் உள்ள தகரக் கூரையின் கீழே (இன்னொரு கோணத்தில் வரைந்தது. மாடுகள் உள்ள கொட்டம். அவை ஓரிடத்தில் நில்லாததால், அவைகளை வரைய நினைத்துப் பின் முடிவை மாற்றிக் கொண்டேன்).

மாடுகளின் gesture ஸைத் தனியாக வரைந்தது.

எனக்குக் கிடைத்த மாடல் (சகோதரர் மகன்). தூங்கும்போதுதான் நன்றாக வரைய முடிந்தது.

இவர்தான் அந்த மாடல், நிமிஷத்துக்கு 10 போஸ் கொடுத்தார். அவ்வளவு சீக்கிரம் வரைய முடியலை. அதான் தூங்கிறப்ப வரைஞ்சது முந்தைய படம். :)

நேரடி போர்ட்ரெய்ட் பை லைவ் மாடல்ஸ்-பென்சில் ஓவியம்

2011-03-27T00:21:00.000+05:30

      இன்று ஓவியர் பிரபாவின் வீட்டில் லைவ் மாடல் போர்ட்ரெயிட் செஸன் நடைபெற்றது.....

     பென்சிலில் வரைந்தேன். அவை பின் வருமாறு....

மொபைலில் படம் பிடித்ததால், கொஞ்சம் சாய்வாக இருக்கலாம்... நேரடியாக நன்றாக இருந்தன. பல வருடங்களுக்குப் பிறகு நேரடியாக மாடல்களைப் பார்த்து வரைந்தேன்...(முன்பு நண்பர்களைப் பார்த்து வரைந்தேன்)....

தனிமை-பென்சில் ஓவியம்

2011-03-24T00:27:00.000+05:30

K B Kulkarni யின் ஒரு ஓவியத்தைப் பார்த்து பென்சிலில் வரைந்தது.(ஒரிஜினல்:ஆயில் பெயிண்டிங்). இது Inspiring ஆ , இல்ல Copy ஆ?
இதன் அவுட்லைன் மட்டும் இன்னுமொன்று பென்சிலில் வரைந்து வைத்திருக்கிறேன்.அதற்கு வாட்டர்கலர் கொடுக்க இருக்கிறேன். முடித்ததும் பதிவேற்றுகிறேன்.

அரிக்கேன் விளக்கு-வாட்டர்கலர்-வெர்ஷன் 2

2011-03-19T23:57:00.000+05:30

தவறெனும் புற்களின் மேல் நடக்க நடக்கப் புலனாகிறது புதியபாதை....

முந்தைய பதிவில் போட்டிருந்த ஓவியம் சரிவர இல்லை. நலம் விரும்பும் ஒரு ஓவியரிடம் கருத்துக் கேட்டதில், தவறுகளைச் சுட்டிக்காட்டியும், அறிவுரைகள் கூறினார்.

அதனால் மறுபடியும் புதிதாக வரைந்துவிட்டேன். முன்னதிற்கு இது பரவாயில்லை. ‘சில் அவுட்’ எஃபக்டை ஓரளவுக்குக் கொண்டு வந்து விட்டேன் எனக் கூறிக் கொள்ளலாம்.

அரிக்கேன் விளக்கு-வாட்டர் கலர்

2011-03-12T12:50:00.000+05:30

இன்னொரு வாட்டர்கலர் ஸ்டடி...need miles to go....

75வது பதிவு- போர்ட்ரெய்ட் ஓவியங்கள் ஸ்பெஷல்-பொக்கிஷம்

2011-03-10T22:14:00.000+05:30

தமிழ்ப்பதிவுலகுக்கு வந்து மூன்றாண்டுகள் ஆனநிலையில் இப்போதுதான் 75வது பதிவு வருகிறதெனில் நான் எவ்வளவு ஆக்டிவாக உள்ளேன் என எண்ணிப்பாருங்கள். ;-) நம்பர்களில் நம்பிக்கையில்லை.(தரத்தில் மட்டும் என்ன வாழுதாம் எனக்கேட்டு விடாதீர்கள்) மனதுக்குத் தோணும் போது மட்டும் பதிவிடுகிறேன். பல பத்து(பல நூறு சொல்லுமளவுக்கு இல்லை) ரசனையான பதிவ நண்பர்களைப் பெற்றிருக்கிறேன். இப்போது எழுத்தை விடவும் கோடுகள் பக்கமே அதிகம் சாய்ந்து கொண்டிருக்கிறேன்.

இன்று பெட்டியை நோண்டுகையில் கிடைத்த பழைய நோட்டில், பத்து வருடங்களுக்கு முன்(வேலையில்லாத போது) கிடைத்த இதழ்களைப் பார்த்துக் கிறுக்கித் தள்ளிய இவ்வோவியங்கள் கிடைத்தன. பெரும்பான்மை படங்கள் கறுப்பு பால்பாயிண்ட் பேனாவில் அரைமணி நேரத்திற்குள் வரையப் பட்டவை. ஒரு ஆவணமாக்க வேண்டுமெனவும், சில நண்பர்களின் வேண்டுகோளுக்கிணங்கவும்(கொஞ்சம் சுயமோகம்) அவற்றைப் பதிவிடுகிறேன். இப்போது அதிகம் உருவப் படங்கள் வரைவதில்லை.உங்களின் வாழ்த்துக்கள் இன்னும் நிறைய நல்ல கோடுகளை என்னிடமிருந்து வெளிக் கொணரும் என நம்புகிறேன்.

குறிப்பு: அதிகப் படங்கள் போட்டிருப்பதால் சிறியதாக்கியிருக்கிறேன். கிளிக்கிப் பெரிதாக்கிப் பார்த்தால் ஓரளவு நன்றாக இருக்கும்.

பாவனா-பென்(ண்)சில்

இதழ் அட்டைப்படம்-பென்(ண்)சில்

ஓவியர் கோபுலு-பால்பாயிண்ட் பென்

ஏதோ ஜோக்-பால் பாயிண்ட் பென்

பெண்-பால்பாயிண்ட் பென்

மாதவன் -பால்பாயிண்ட் பென்

ஸ்வேதா குட்டி-பால் பாயிண்ட் பென்

வாலி- பால் பாயிண்ட் பென்

கீர்த்தனா-கன்னத்தில் முத்தமிட்டால்-பால்பாயிண்ட் பென்

திரிஷா(சினிமாவுக்கு முன்)-பால்பாயிண்ட் பென்

நந்திதா தாஸ் அஸ் அழகி-பால் பாயிண்ட் பென்

லாலேட்டன் -பால் பாயிண்ட் பென்

தனுஷ்-பால்பாயிண்ட் பென்

வைரமுத்து-போஸ்டர் (அ) வாட்டர் கலர்(நினைவில்லை) ம.செ வின் ஓவியத்தில் இன்ஸ்பைர் ஆகி வரைந்தது

ஜெயகாந்தன் - ஜெல் பென்

இசை-பால் பாயிண்ட் பென்

பூந்தொட்டி-வாட்டர்கலர்

2011-03-05T16:50:00.000+05:30

My first try for impressionism(after 2 failure attempts) with water colors.
model: Flower vas

Had fun with colors once again today...

சிவப்பு மொசைக் தரை-ஓவியம்

2011-02-28T22:59:00.000+05:30

எனது அறையின் படுக்கையில் அமர்ந்து வரைந்தது. ஒருச்சாய்த்திருக்கும் கதவு. கதவின் வலப்புறம் மேலே குழல் ஆவிவிளக்கு. அதன் ஒளிவிளைவுகள் கொஞ்சம் மூடிய கதவினாலும், தரையிலிருந்த சிவப்பு மொசைக் கற்களினாலும் விதவிதமாகப் பிரதிபலித்துக் கொண்டிருந்தது. அதனைக் கொண்டு வர முயற்சித்தேன்.

உபகரணங்கள்: வாட்டர்கலர் பென்சில்கள், கொஞ்சம் தண்ணீரால் சில இடங்களில் டச் அப் செய்யப் பட்டது. திருப்தி ஏற்படவில்லை(நேர்க் கோடுகள் வரைவதில் இன்னும் பயிற்சி தேவை).. இருப்பினும் பரவாயில்லை ரகம்.
மொசைக் தரையின் ஒளிப் பிரதிபலிப்புகள் எனக்குப் பிடித்தது. :) (காக்கைக்கும் தன் குஞ்சு பொன் குஞ்சு) :)))))

பிராக்டீஸ் மேக்ஸ் எ மேன் பெர்ஃபெக்ட்(நன்றி: சந்தானம்)

வெயில்-ஆயில் பெயிண்டிங்

2011-02-05T03:18:00.000+05:30

அலுவலகத்தில் புதிதாகச் செலலும் ஒரு தளத்தின் சுவர்களை அழகுபடுத்த, எங்களிடம் ஒரு போட்டி வைத்து அதிலிருந்து 15 ஓவியங்களைத் தேர்வு செய்யப் போவதாக அறிவிப்பு வந்தது. கம்பெனி பற்றிய ஒரு தீமுடன் இப்படத்தை வ்ரைந்து கொடுத்திருந்தேன். 50 படங்களில் தேர்வான பதினைந்தில் எனது படமும் ஒன்று. சில காரணங்களால், அப்படத்தில் வரும் தீமை மட்டும் நீக்கிவிட்டு(படத்தின் கீழ்ப்பகுதியில் தெரியும் பேட்ச் ஒர்க்குக்கு அதுதான் காரணம்)ப் பதிவிட்டிருக்கிறேன்.

உபகரணங்கள்: ஆயில் கலர்,லின்சீட் ஆயில்
அளவு:24" x 34"

ஆடுகளம்-எனது பார்வை

2011-01-14T18:51:00.000+05:30

Disclaimer:இப்பார்வையில் படத்தின் கதை எங்கும் சொல்லப்படவில்லை. தைரியமாகப் படிக்கலாம். இப்படம் எனக்குக் கொடுத்த உணர்வை மட்டும் பகிர்கிறேன்.

இரண்டு வருடங்களுக்கு முன்பு ஒரு தீபாவளியின் போது ‘பொல்லாதவன்’ வந்திருந்தது. தியேட்டர் எதிரே டீக்கடையில் இரண்டு பேர் அது ஏதோ பல்ஸார் விளம்பரப்படம் எனப் பேசிக்கொண்டிருந்ததில், ஜெர்க்காகி, ‘கண்ணாமூச்சி ஏனடா’ ஓடும் தியேட்டருக்குச் சென்று கூராகச் சீவிய ஆப்பில் அமர்ந்து வந்தேன். அந்தத் தீபாவளி ரிலீஸில் கறுப்புக் குதிரையாய் வெற்றி பெற்றது வெற்றிமாறனின் ‘பொல்லாதவன்’.அதன்பின் அப்படம் பார்த்து அதன் மேக்கிங்கில் வியந்தேன்.

இம்முறை அப்படி ஆகிவிடக்கூடாதென்று முதல்நாள் முதல் ஷோவே ‘ஆடுகளம்’ போய்விட நினைத்திருந்தேன்.இரவின் பயணக்களைப்பில் சற்றுக் கண்ணசந்ததில் இரண்டாவது ஷோதான் போகமுடிந்தது. டைட்டில் போடும்போதே பின்குரலில் ‘சேவக்கட்டு’தான் கதை என்பதைச் சொல்லிவிடுகிறார்கள்.அதில் என்ன சுவாரஸ்யம் இருக்கப் போகிறது எனச் சற்று சோர்வாக அமர நினைக்கையில் அடுத்தடுத்து வரும் காட்சிகள் எழுந்துநின்று கைதட்ட வைக்கிறது. 90 நிமிடங்கள் ஓடுகிற முதல் பாதியில் டைரக்டர் எங்கெங்கு விசிலடிக்க வைக்க வேண்டுமென்று ஸ்கெட்ச் போட்டு திரைக்கதை பண்ணி உழைத்திருப்பது தெரிகிறது. சேவல் சண்டையில் எப்போதும் ஜெயித்துக் கொண்டிருக்கும் பேட்டைக்காரரின்(வ.ஐ.ச.ஜெயபாலன்) உடன் இருப்போர் கருப்பு(தனுஷ்), துரை(கிஷோர்),அயூப்(பெரியகருப்பத் தேவர்)களுக்கும், ஒரு முறையாவது பந்தயத்தில் ஜெயித்து தன் குலப்பெருமையைக் காப்பாற்ற நினைத்து அடிக்கடித் தோற்றுவிடும் இன்ஸ்பெக்டர் ரத்தினத்துக்கும் இடையில் நடக்கும் ஆடுகள நிகழ்வுகள்தான் முதல் பாதி.

பேட்டைக்காரரின் கெத்து, அவரின் தோரணை, பெரியமனுஷத்தனம்,சேவக்கட்டில் எப்போதும் தவறாத அவரது கணிப்பு எல்லாம் கச்சிதம். தனுஷ் டெய்லர் மேட் பாத்திரம். கிஷோர் வித்தியாசமாக முடி, தாடியுடன் வருகிறார். இடையில் கண்டதும் காதல் கொள்வதற்கென்றே வரும் ஹீரோயினாக டாப்ஸி பன்னு(அப்டித்தான் டைட்டிலில் போடுகிறார்கள்). களவாண்ட சேவலைக் கண்டடையும் இடத்தில் தனுஷுக்கான கோழியாக மாட்டுகிறார் டாப்ஸீ,ஆங்கிலோ இந்தியப் பெண் பாத்திரம்.(வெள்ளாவி வச்சுத்தான் வெளுத்தாய்ங்களோ. இல்ல வெயிலுக்கே காட்டாம வளர்த்தாய்ங்களோ-நச்சின்னு சொல்லிட்டாய்ங்க பாடலில்). பழக்கப்பட்ட காட்சிகள் எனினும், மதுரை ரெயில்வே காலனி பின்புறத்தில்,மதுரை பாஷையில் ஓரளவு கலகலப்பாக நகர்கிறது காதல் காட்சிகள்.

      தனுஷ் நாயகியின் மேல் உருகும் போது வரும் பாடல் ‘யாத்தே...யாத்தே’. இப்பாடலைத் தியேட்டரில்தான் பார்க்கவேண்டும் என முன்பே முடிவெடுத்திருந்தேன்.சற்றும் ஏமாற்றவில்லை. விசில்களால் அதிர்கிறது திரையரங்கம். தனுஷிடம் டாப்ஸீ தனது காதலைச் சொன்னபிறகு வரும் ஒரு பாடலில் தனுஷின் டப்பாங்குத்து செம்ம கெத்து.டாப்ஸீக்கு அவ்வளவாக நடிக்கும் வேலையில்லை. பொம்மைதான்.அவர் பேசும் ஆங்கிலம் தனுஷை மட்டுமல்ல தியேட்டரில் அனைவரையும் கடுப்பேற்றுகிறது. அவரை அசத்த தனுஷ் ஆங்கிலத்தில் சொல்லும் ‘ஐ யாம் லவ் யூ’ க்யூட் காமெடி.ட்ரைலரில் எனக்குப் பிடித்த ‘கொன்ண்டே புடுவேன்’ ஐ அவர் படத்தில் உபயோகிக்கும் இடம் அவ்வளவாகப் பிடிக்கவில்லை. ‘சுனாமிலே சும்மிங் பன்றவங்க’ ,’அம்பானிக்கே அட்வைஸ் பண்றவைங்க’ தனுஷின் டெலிவரியில் நன்றாக எடுபடும் வசனங்கள்.

     ஒரு கட்டத்தில் காதல் காட்சிகள் ஓரங்கட்டப்பட்டு, சேவல்சண்டை வருகிறது.நடைபெறும் விதம்,போட்டி விதிகள்,அதற்கான கட்டுப்பாடு என நம்மை உள்ளிழுத்துவிடுகிறார்கள்.கொஞ்சம் கொஞ்சமாக டெம்போ ஏத்தி இண்டர்வல் ப்ளாக்கில் ஒரு முழு ஆக்‌ஷன் படத்தின் கிளைமேக்ஸ் உணர்வை ஏற்றிவிடுகிறார் வெற்றிமாறன். சேவல் சண்டைதானே எனச் சொல்லிவிடமுடியாத படி ஒரு 20-20 கிரிக்கெட் மேட்ச் பார்க்கும் ஆவலை ஏற்படுத்திவிடுகிறார். உயிர்வதை செய்யக் கூடாதென்பதற்காக, சேவல் சண்டைகளை முழுக்கமுழுக்க அனிமேஷனில் பண்ணியிருக்கிறார்கள்.அது அவ்வளவு இயல்பாகத் தெரிந்ததில் உழைப்பு விளங்குகிறது.இடைவேளை விட்டவுடன் படம் முடிந்த திருப்தி தெரிகிறது.

      இன்னும் அதிக எதிர்பார்ப்பில் அமர்ந்தால் இரண்டாம்பாதியில் கொஞ்சம் ஏமாற்றிவிட்டார் இயக்குனர்.படம் ஓவர் கமர்ஷியலாகப் போய்விடுமோ எனப்பயந்து,கொஞ்சம் சீரியஸாகக் கதை சொல்லுகிறார். அதிக சோகக் காட்சிகள்...ஆனால் சொன்னவிதத்தில் அதிலும் அழுத்தம் இல்லை.நம்பிக்கை, துரோகம், காதல்,அம்மா பாசம், வீரம், வைராக்கியம் இவையனைத்தையும் பின்பாதியில் ஒரேயடியாகத் திணித்துவிட முனைந்ததில் சற்றுப் பின்னடைந்திருக்கிறார். மருந்துக்குக் கூட கமர்ஷியல் காட்சிகள் இல்லை பின்பகுதியில்.சொல்லவந்ததைச் சொல்லிவிட்டார் ஆனால் அது ரசிகர்களுக்குப் பிடிக்கவில்லையென்பது கண்கூடாகத் தெரிகிறது. கொஞ்சம் எடிட்டிங்கிற்கு வேலை கொடுத்திருந்தால் கச்சிதமான பேக்காஜாக இருந்திருக்கும் ‘ஆடுகளம்’

    2 பாடல்கள் ஏற்கெனவே ஹிட் பின்னணி இசை பரவாயில்லை.ஜிவி பிரகாஷ் தேறிவருகிறார். ஒளிப்பதிவு (வேல்ராஜ்) அழகு. ஒவ்வொரு ஃப்ரேமும் எதிர்பாராத ஆங்கிள்களில் எடுக்கப் பட்டிருக்கிறது திரையில் வரும் காட்சிகளை நடிகர்களை மட்டும் எடுத்துவிட்டால் அப்படியே சுவரில் மாட்டிவிடும் ஓவியங்கள் போல் உள்ளது. அதிகாலை, பின்னிரவுக் காட்சிகள் கச்சிதமாக நேர்த்தியான வண்ணக்கலவையுடன் நேரில் பார்ப்பது போல் உள்ளது. ஆனால் பெரும்பாலான காட்சிகள் இருட்டிலேயே இருப்பதால் பொதுசனரசனை ஏற்றுக் கொள்வது சந்தேகமே.சண்டைகள் அதிகம் இல்லை. இரண்டுதானெனினும் இயல்பு, வன்முறை அதிகம்.

        இரண்டாவது படத்திலும் வெற்றிமாறன் எனக்குப் பிடித்தபடமே தந்திருக்கிறார். படத்தின் ரிசல்ட் அவரது பேரின் முதல் பாதியில் மட்டும் இருப்பது போல் முதல் பாதியிலேயே தொக்கிவிடுகிறது.

    சன் பிக்சர்ஸ் ஓட்டிவிடும்....

வெற்றிமாறனை எனக்கு அதிகமாகப் பிடித்துப் போகிறது. காட்சிகளைச் செதுக்கிய விதம் அவரின் திறமையைக் காட்டுகிறது. புதிய அனுபவம் தேடுவோர் கட்டாயம் பார்க்கலாம்.

விட்டு விடுதலையாகி...

2011-01-12T01:03:00.000+05:30

ஆயில் பேஸ்டல் மற்றும் ஆயில் கலர்ஸ்